قازاقستان ونكولوگيالىق ناۋقاستاردى ەمدەۋدە قاي ەلدەردىڭ تاجىريبەسىن نەگىزگە الادى
«كوپتەگەن ەلدەردە ونكولوگيالىق اۋرۋلاردى ەمدەۋ سالاسىنداعى ءوز جەتىستىكتەرى بار. ءبىرىنشى كەزەكتە، ءوز تيىمدىلىگىن كورسەتكەن، سۇرانىسقا يە جانە جوعارى ءتيىمدى جابدىقتىڭ بولۋىن ەسكەرە وتىرىپ، قازاقستاندا ەنگىزىلۋى مۇمكىن تەحنولوگيالار قابىلدانادى. قازىرگى ۋاقىتتا الەمدە ونكوورتوپەديادا 3D تەحنولوگياسىنىڭ ءارتۇرلى ادىستەرى بەلسەندى قولدانىلادى جانە دامۋدا. وپەراتسيانىڭ بۇل ءتۇرى حيرۋرگيالىق توپتىڭ ارنايى دايىندىعىن، انەستەزيولوگيالىق قۇرالداردىڭ كاسىبيلىگىن، زاماناۋي جابدىقتاردىڭ بولۋىن تالاپ ەتەدى. ايتا كەتۋ كەرەك، بۇل باعىتتا ونكوورتوپەديانىڭ الەمدىك كوشباسشىلارىنىڭ ءبىرى - قىتاي»، - دەدى ازامات دۇيسەنوۆ ءتىلشى ساۋالىنا وراي.
دەپارتامەنت دەرەگىنشە، ەلىمىزدە قاتەرلى ىسىكتى ەمدەۋ ەۋروپالىق ستاندارتتارعا ساي جۇرگىزىلەدى.
«قازاقستاندا ونكولوگيالىق دياگنوز بار ناۋقاستارعا جۇرەتىن ەمدەۋ تاسىلدەرى مەن دياگنوستيكاسىنىڭ حاتتامالارى ەۋروپالىق تالاپتارعا سايكەس كەلەدى. ياعني، ەلىمىزدە ونكولوگياعا قارسى ەمنىڭ كەڭ تارالعان تۇرلەرى كورسەتىلەدى. ەگەر ونكولوگيالىق ناۋقاستاردى ەمدەۋ كەزىندە كەيبىر تەحنولوگيالار مەن قىزمەتتەر ەلدە جوق جانە كورسەتىلىمدەر كەزىندە بۇل پاتسيەنتتەر تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قاجەت قىزمەتتەردى كورسەتەتىن شەتەلدىك كلينيكالارعا ەمدەلۋگە جىبەرىلەدى»، - دەپ جازىلعان ازامات دۇيسەنوۆتىڭ جاۋابىندا.
قوسا كەتسەك، قازاقستاندا ونكولوگيامەن اۋىراتىن 210 مىڭنان استام ادام ەسەپتە تۇر.
كەيىنگى 2 جىلدا جاستاردان قاتەرلى ىسىك ءجيى انىقتالىپ جاتىر.
جالپى جىل سايىن ونوكولوگياعا شالدىققان ناۋقاستاردى ەمدەۋگە 36 ميلليارد تەڭگە بولىنەدى.
