استانادا سىيىمدىلىعى شاعىن ءۇي اشىلدى

استانا. قازاقپارات - ق ر الەۋمەتتىك كودەكسىن ىسكە اسىرۋ اياسىندا قازاقستان وڭىرلەرىندە جەكە سەكتوردى تارتا وتىرىپ، ارناۋلى الەۋمەتتىك قىزمەتتەر كورسەتۋ ءۇشىن سىيىمدىلىعى شاعىن ۇيلەر قۇرۋ جونىندەگى پيلوتتىق جوبا باستالدى، دەپ حابارلايدى قازاقپارات.

ەڭبەك جانە حالىقتى الەۋمەتتىك قورعاۋ مينيسترلىگىنەن ءمالىم ەتكەندەي، جان باسىنا شاققانداعى قارجىلاندىرۋدى ەنگىزۋ ارقىلى جەكە سەكتوردى تارتا وتىرىپ، ارناۋلى الەۋمەتتىك قىزمەتتەر كورسەتۋدىڭ مەملەكەتتىك ورتالىقتارىن كەزەڭ-كەزەڭىمەن مونوپوليادان ارىلتۋ جوسپارلانۋدا. مۇگەدەكتىگى بار ادامدارعا ارنالعان سىيىمدىلىعى شاعىن ۇيلەر اۋىلدىق جەرلەردە دە سالىناتىن بولادى.

پيلوتتىق جوباعا ەلىمىزدىڭ 7 ءوڭىرى قاتىسپاق، ولار: اقمولا، باتىس قازاقستان، قاراعاندى، تۇركىستان وبلىستارى جانە استانا، الماتى، شىمكەنت قالالارى.

بۇعان دەيىن حابارلانعانداي، مۇگەدەكتىگى بار بالالارعا ارنالعان العاشقى شاعىن ءۇي 2023 -جىلدىڭ 4-شىلدەسىندە قاراعاندىدا اشىلدى.

بيىل 29-تامىزدا كوكشەتاۋ جانە شىمكەنت قالالارىندا، ال 1-قىركۇيەكتە استانا قالاسىندا وسىنداي ۇيلەر پايدالانۋعا بەرىلدى.

«مۇگەدەكتىگى بار بالالارعا ارنالعان سىيىمدىلىعى شاعىن ۇيلەردە ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمى قولجەتىمدى. ولار الەۋمەتتىك- تۇرمىستىق، الەۋمەتتىك- مەديتسينالىق، الەۋمەتتىك- پسيحولوگيالىق، الەۋمەتتىك- پەداگوگيكالىق، الەۋمەتتىك- ەڭبەك، الەۋمەتتىك- مادەني، الەۋمەتتىك- قۇقىقتىق، الەۋمەتتىك-ەكونوميكالىق. ورتالىقتاردا ەمدىك دەنە شىنىقتىرۋ، ماسساج، دەفەكتولوگ، لوگوپەد، پسيحولوگ كابينەتتەرى جانە بالالاردى دامىتۋعا ارنالعان ءتۇرلى كابينەتتەر بار. بۇگىندە سىيىمدىلىعى شاعىن ۇيلەردە 80 گە جۋىق بالا قىزمەت الىپ وتىر. سىيىمدىلىعى شاعىن ۇيلەر جاعدايىندا قىزمەت كورسەتۋ ستاتسيونارلىق جانە جارتىلاي ستاتسيونارلىق ۇيىمداردىڭ قولدانىستاعى جەلىسىنە بالاما بولىپ تابىلادى جانە بالانىڭ وتباسىمەن بىرگە بولۋىنا باعىتتالعان. بۇل باستاما مۇگەدەكتىگى بار بالالاردىڭ اتا-انالارىنا جۇمىس جاساۋىنا جانە وتباسىنىڭ ءال- اۋقاتىن ارتتىرۋعا مۇمكىندىك بەرەدى»، - دەلىنگەن مينيسترلىك مالىمەتىندە.