قازاقشا ءبىلۋ – قاجەتتىلىك - ەلينا ماساگۋتوۆا

استانا. قازاقپارات - ەلينا ماساگۋتوۆا - رەسپۋبليكالىق «قوعامدىق كەلىسىم» مەملەكەتتىك مەكەمەسىنىڭ ديرەكتورى. پاۆلودار وڭىرىندە تۋىپ-وسكەن ول - قازاق ءتىلىنىڭ جاناشىرى.

مەملەكەتتىك ءتىلدى سانالى تۇردە مەڭگەرىپ، اينالاسىنا ۇلگى-ونەگە بولىپ ءجۇر.

- اكەم - ورىس، شەشەم - تاتار. تاتارعا كۇيەۋگە شىقتىم. وتباسىمىزدى شاعىن اسسامبلەيا دەسە دە بولادى. اكە-شەشەم مەكتەپتە مۇعالىم بولىپ جۇمىس ىستەيدى.

پاۆلودار قالاسىندا ورىس مەكتەبىندە ءبىلىم الدىم. 9-سىنىپتان كەيىن وبلىس ورتالىعىنداعى مەملەكەتتىك ۋنيۆەرسيتەتتىڭ جانىنداعى ليتسەيگە وقۋعا ءتۇستىم. قازاق تىلىنە دەگەن قىزىعۋشىلىعىم دا وسى كەزدەن باستالدى. بۇعان دەيىن بارلىق وقۋشى سەكىلدى قازاق ءتىلىن ساباق دەڭگەيىندە عانا مەڭگەردىك. 9-سىنىپتان كەيىن تەرەڭدەتە وقۋعا دەن قويدىم. وليمپيادالارعا قاتىسا باستادىم. وتباسىمىزدا ورىسشا جانە تاتارشا سويلەيتىنبىز. ال تاتار ءتىلى قازاق تىلىنە ۇقسايدى. سوندىقتان دا قازاق ءتىلىن ەركىن مەڭگەرۋ قيىن بولعان جوق. ونىڭ ۇستىنە اكەم قازاقشا كىتاپ وقۋىمدى، تەلەديداردان قازاقشا باعدارلامالار كورۋىمدى تاپسىراتىن، قاداعالايتىن.

وسىلايشا، اكەمنىڭ قولداۋىمەن مەملەكەتتىك تىلدە ەركىن سويلەيتىن دەڭگەيگە جەتتىم. مەنىڭ وتانىم - قازاقستان. مۇنداعى نەگىزگى حالىق - قازاقتار. سوندىقتان قازاق ءتىلىن بىلۋگە مىندەتتىمىن. ءوزىڭدى وسى ەلدىڭ ناعىز ازاماتى رەتىندە سەزىنگىڭ كەلسە، قازاقشا ۇيرەنۋىڭ كەرەك. سوندا عانا وسىندا تۇراتىن ادامداردىڭ جان- دۇنيەسىنە ۇڭىلە الاسىڭ، - دەيدى ەلينا.

12 جاسىنان باستاپ قازاقستان حالقى اسسامبلەياسىنىڭ جۇمىسىنا ارالاسىپ، «اسسامبلەيانىڭ بالاسى» اتانىپ كەتكەن ەلينا قوعامدىق ءھام مەملەكەتتىك قىزمەتتەردە قازاق ءتىلىن ناسيحاتتاۋعا دەن قويادى. قازىر رەسپۋبليكالىق «قوعامدىق كەلىسىم» مەملەكەتتىك مەكەمەسىنىڭ ديرەكتورى رەتىندە دە قازاق ءتىلىنىڭ دامۋىنا قال- قادەرىنشە ۇلەس قوسىپ كەلەدى.

- پاۆلوداردا جۇرگەندە وزگە ۇلت جاستارى اراسىندا قازاقشا سويلەۋ كلۋبتارىن اشتىق. بۇل باستامامىز ءوز جەمىسىن بەردى. قازىرگى جۇمىسىم تىكەلەي وسى سالامەن بايلانىستى دەسەم دە بولادى. «قوعامدىق كەلىسىم» مەكەمەسى بىرنەشە جوبا ارقىلى مەملەكەتتىك ءتىلدى ناسيحاتتاپ كەلەدى. ماسەلەن، جاستارعا ارنالعان «بىرلىك» لاگەرى، «ءبىر ەل» ەكسپەديتسياسى، «ۇيدە سويلە» جوباسى ارقىلى قازاق ءتىلىن ناسيحاتتاپ ءجۇرمىز. جالپى، ءاربىر وتباسى ۇيىندە قازاقشا سويلەۋگە ءتيىس. وسىنداي ءۇردىس قالىپتاسۋى كەرەك. اتا- انالار ۇل- قىزدارىنىڭ بولاشاعىن ويلاسا، وسىعان مىقتاپ كوڭىل بولگەنى ابزال. ويتكەنى قازاق ءتىلى ومىرلىك قاجەتتىلىككە اينالدى. وسىنى ەستەن شىعارماۋ كەرەك. قازاقشا قاتە سويلەپ، ۇياتقا قالامىن دەپ قىسىلماعان دۇرىس. مەملەكەتتىك قىزمەتكە جۇمىسقا تۇراردا قازاق ءتىلىن قانشالىقتى مەڭگەرگەنىن ءبىلۋ ءۇشىن تەست تاپسىرادى. مۇنداي تالاپتى كۇشەيتۋ كەرەك. ءدال وسى جاعداي وزگەلەردىڭ قازاق ءتىلىن مەڭگەرۋىنە ىقپال ەتەدى دەپ ويلايمىن، - دەيدى ەلينا سەرگەيەۆنا.

بەرتىنگە دەيىن ءبىر اۋىز قازاقشا بىلەتىن وزگە ۇلت وكىلىن كورسەك، ەلپىلدەپ قالاتىن ەدىك. كەيىنگى ۋاقىتتا بۇعان دا كوز ۇيرەنىپ، تاڭدانبايتىن بولدىق. سولاي بولۋى دا كەرەك. ويتكەنى ولار ءوز وتانىنىڭ تىلىندە سويلەيدى.