قاسىم حانعا قاتىستى قولجازبانىڭ كوشىرمەسى فرانسيادان جەتكىزىلدى

استانا. قازاقپارات - مادەنيەت جانە اقپارات مينيسترلىگى ارحيۆ، قۇجاتتاما جانە كىتاپ ءىسى كوميتەتىنە قاراستى قولجازبالار جانە سيرەك كىتاپتار ۇلتتىق ورتالىعىنىڭ ماماندارى قاسىم حاننىڭ ايەلى ايشا حانىمنىڭ فرانسيادان تابىلعان قولجازبا كوشىرمەسىن باسىپ شىعاردى، دەپ حابارلايدى قازاقپارات ءتىلشىسى.

ورتالىق ماماندارىنىڭ ايتۋىنشا، قۇندى عىلىمي جادىگەر تۇركى تىلىندەگى (قىپشاق ديالەكتىسى) مۇسىلمان تەولوگياسى بويىنشا جازىلعان.

قولجازبا 7 تاراۋدان تۇرادى. ءاربىر ءبولىم يسلامنىڭ قاسيەتتى كەيىپكەرلەرىنە قاتىستى ءبىر نەمەسە بىرنەشە حيكايالارمەن تولىقتىرىلعان. XV عاسىر سوڭىندا وزبەك- قازاق سۇلتانى قاسىم جاھانگيرگە (قاسىم حان) تۇرمىسقا شىققان ايشا سۇلتان حانىم- بەگىم تيمۋريدتەردىڭ بيلەۋشىسى سۇلتان حۋسەين مىرزانىڭ قىزى رەتىندە دە بەلگىلى. قولجازبا ايشا سۇلتان حانىم- بەگىمنىڭ جەكە كىتاپحاناسىندا ساقتالعان. كىتاپ شايبانيدتەر ماۋەرەنناحرعا كەلگەننەن كەيىن ورتا ازيادان قاشقان تيمۋريدتەر ارقىلى ءۇندىستانعا جەتكەن. قولجازبانى XIX عاسىردا فرانسيانىڭ ۇلتتىق كىتاپحاناسى ساتىپ العان. قاسىم سۇلتان مەن حۋسەين بايقارا اراسىنداعى ديپلوماتيالىق قارىم- قاتىناس بەلگىسى، - دەدى ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى قۋات بوراش.

ورتالىق قىزمەتكەرلەرى كىتاپتى تۇپتەۋ جۇمىستارى 2 اپتاعا سوزىلعانىن ايتادى. كوشىرمەنىڭ جەكەلەگەن بەتتەرى بىرىكتىرىلىپ، ءبۇتىن بلوكپەن ماقتا ءجىبىن قولدانۋ ارقىلى تىگىلگەن. سونداي- اق مۇقاباسىنا ارنايى باتيست ماتاسى قاپتالىپ، كارتون قاعازى مەن قانىق جاسىل ءتۇستى تابيعي بىلعارى قولدانىلعان.

قولجازبانىڭ ءتۇپنۇسقاسى پاريج ۇلتتىق كىتاپحاناسىندا ساقتالعان. قولجازبا شامامەن 1501-1515 -جىلدارى جازىلعان. تاريحي مۇرانىڭ تولىق نۇسقاسى ساقتالماعان. ويتكەنى باسى مەن سوڭعى بەتتەرى جوق.