ەلىمىزدە ايەلدەر مەن بالالارعا كومەك كورسەتۋگە ارنالعان ءبىرىڭعاي بايلانىس ءنومىرى پايدا بولادى

استانا. قازاقپارات - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى «بايلانىس قىزمەتتەرىن پايدالانۋشىلار ءۇشىن قوسىلۋى تەگىن بولىپ تابىلاتىن شۇعىل مەديتسينالىق، قۇقىق قورعاۋ، ءورت، اۆاريا جانە باسقا دا قىزمەتتەردىڭ تىزبەسىن بەكىتۋ تۋرالى» ۇكىمەت قاۋلىسىن تولىقتىرماق، دەپ حابارلايدى قازاقپارات ءتىلشىسى.

ەندى وتباسىلىق ماسەلەلەر بويىنشا باستاپقى زاڭ كومەگىن بەرۋگە ارنالعان ءبىرىڭعاي بايلانىس ءنومىرى بەكىتىلمەك.

«111 وتباسى، ايەلدەر جانە بالالاردىڭ قۇقىقتارىن قورعاۋ جونىندەگى بايلانىس ورتالىعى»، - دەلىنگەن اشىق ن ق ا پورتالىندا جاريالانعان ۇكىمەت قاۋلىسىنىڭ جوباسىندا.

قۇجاتقا قوسىمشا بەرىلگەن تۇسىندىرمەدە جازىلعانداي، «111» بايلانىس نومىرىنە حابارلاسۋ تەگىن بولادى.

«جوبانىڭ ماقساتى - اقپاراتتىق- انىقتامالىق، ۇيىمداستىرۋشىلىق، پسيحولوگيالىق كومەك كورسەتۋ، سونداي-اق ازاماتتاردىڭ زاڭدى قۇقىقتارىن قامتاماسىز ەتۋگە قاتىستى بارلىق ماسەلەلەر بويىنشا باستاپقى كونسۋلتاتسيالار وتكىزۋ ءۇشىن ءاربىر ازاماتقا تەگىن قوسىلۋ بايلانىس قىزمەتتەرىن ۇسىنۋ»، - دەپ تۇسىندىرمە بەرىلگەن قاۋلىعا.

قۇجات 18- قىركۇيەككە دەيىن كوپشىلىك تالقىلاۋدا بولادى.