پرەزيدەنت ۇلتتىق بانكتىڭ باسشىلىعىنا تيمۋر سۇلەيمەنوۆتى تانىستىردى
پرەزيدەنت جاڭادان تاعايىندالعان باسشىنىڭ قارجى- ەكونوميكالىق باعىتتا مول تاجىريبەسى بار ەكەنىن جانە قارجى رەتتەۋشىسىنىڭ قىزمەتىن جەتىك بىلەتىنىن، ءتورت جىلدان استام ۋاقىت پرەزيدەنت اكىمشىلىگىنىڭ الەۋمەتتىك-ەكونوميكالىق بلوگىن باسقارعانىن اتاپ ءوتتى.
مەملەكەت باسشىسى اتقارعان جۇمىسى ءۇشىن عالىمجان ءپىرماتوۆقا العىس ايتىپ، قابىلدانعان شارالاردىڭ ناتيجەسىندە ماكروەكونوميكالىق، قارجىلىق تۇراقتىلىق قامتاماسىز ەتىلگەنىن اتاپ ءوتتى.
پرەزيدەنت ۇلتتىق بانككە ينفلياتسيانى تومەندەتۋ، قارجى تەحنولوگيالارى مەن يننوۆاتسيانى دامىتۋ جانە كەلەسى جىلى ۇلتتىق تولەم جۇيەسىن تولىققاندى ىسكە قوسۋ جونىندە ماڭىزدى مىندەتتەر جۇكتەلگەنىن حابارلادى. - ءبىز بيزنەستى جەتكىلىكتى دارەجەدە نەسيەلەندىرۋدى قامتاماسىز ەتۋ مىندەتىن كوتەرگەنىمىزگە ءبىر جىل عانا بولعان جوق. بۇل جۇمىستى جەدەلدەتۋ قاجەتتىگى جونىندە مەن قازاقستان حالقىنا جولداۋىمدا مالىمدەدىم. اتالعان ماسەلە بويىنشا تەڭگەرىمدى شەشىم تابۋ، جاڭا تاسىلدەردى، قۇرالدار مەن تەتىكتەردى ەنگىزۋ ءىسىن بەلسەندى تۇردە ىنتالاندىرۋ ماڭىزدى. حالىقارالىق قارجىلىق ىنتىماقتاستىققا جانە ۇلتتىق بانكتىڭ ءۇشىنشى ەلدەردىڭ ورتالىق بانكتەرىمەن جانە قارجى ينستيتۋتتارىمەن ءوزارا ءىس-ارەكەتىنە قاتىستى ماسەلەلەرگە ەرەكشە نازار اۋدارۋ قاجەت. قازىرگى گەوساياسي جاعدايدا ەلىمىزدىڭ قارجى جۇيەسىنە جاھاندىق رەتتەۋشىلەردىڭ قىزىعۋشىلىعى ارتىپ كەلەدى. سوندىقتان وسىنداي قارىم-قاتىناس ورناتۋدا تەڭگەرىمدى ءارى ءتيىمدى جول تابۋ جانە ەلدىڭ قارجىلىق قاۋىپسىزدىگى ءۇشىن تاۋەكەلدەر مەن سالدارعا ءتيىستى باعا بەرۋدى قامتاماسىز ەتۋ ماڭىزدى، - دەدى پرەزيدەنت.
قاسىم-جومارت توقايەۆ ۇلتتىق بانكتىڭ ۇجىمى جۇكتەلگەن بارلىق مىندەتتى جۇزەگە اسىرا الاتىنىنا سەنىم ءبىلدىردى.
