تۇركيادا قازاقستان ازاماتشاسى مەن ونىڭ ەكى جاسار ءسابيى كوز جۇمدى
TRT Haber- ءدىڭ جازۋىنشا، اپات سالدارىنان سافاري كولىگىندە بولعان قازاقستان ازاماتشاسى وقيعا ورنىندا كوز جۇمدى. رەسەيلىك تۋريست پەن 2 جاسار قازاقستاندىق ءسابي اۋرۋحانادا قايتىس بولدى.
ەكى كولىكتە بولعان 20 عا جۋىق ادام زارداپ شەككەن. ولاردىڭ اراسىندا قازاقستان، تۇركيا، يزرايل جانە رەسەي ازاماتتارى بار.
اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ جازۋىنشا، تۇركيادا ارايلىم باعىتجان مەن ونىڭ ءسابيى مەرت بولدى. كۇيەۋى اۋرۋحانادا جاتىر.
«انتاليادان سۋىق حابار كەلىپ جاتىر. بەلگىلى جۋرناليست، «زەيىن اتىراۋ» ەرەكشە بالالاردى وڭالتۋ ورتالىعىنىڭ نەگىزىن قالاعان ارايلىم باعىتجان انتاليادا ءىرى جول اپاتىنا ءتۇسىپ، ومىردەن ءوتتى. ارىپتەسىمىزبەن بىرگە كىشكەنتاي ءسابيى دە و دۇنيەلىك بولدى. جولداسى قيىن جاعدايدا اۋرۋحانادا جاتىر.
قازىرگى ۋاقىتتا تۇركياداعى قازاقستان ەلشىلىگىمەن كەلىسىمدەر جۇرگىزىلىپ، اۋرۋحانادا جاتقان باۋىرىمىزدىڭ ءتيىستى ەم الۋىنا جاعداي جاسالۋدا.
جەرلەستەرىمىزدىڭ سۇيەگىن ەلگە الدىرۋ بويىنشا جۇمىس جۇرگىزىلىپ جاتىر.
مارقۇمنىڭ وتباسىنا قايعىرىپ كوڭىل ايتامىن»، - دەدى ج. بيسەمبيەۆ.
