جاڭادان قۇرىلاتىن مادەنيەت جانە اقپارات مينيسترلىگى نەمەن اينالىسادى

استانا. قازاقپارات - جاڭادان قۇرىلاتىن مادەنيەت جانە اقپارات مينيسترلىگىنىڭ قىزمەت باعىتى مەن ەرەجەلەرىن بەكىتۋدى كوزدەيتىن ۇكىمەت قاۋلىسى اشىق تالقىعا شىعارىلدى، دەپ حابارلايدى قازاقپارات ءتىلشىسى.

«مادەنيەت جانە اقپارات مينيسترلىگى مادەنيەت، تاريحي- مادەني مۇرا وبەكتىلەرىن قورعاۋ جانە پايدالانۋ، كينەماتوگرافيا، مەملەكەتتىك رامىزدەر، ارحيۆ ءىسى جانە باسقارۋدى قۇجاتتامالىق قامتاماسىز ەتۋ، ەلەكتروندىق قۇجات اينالىمى جانە ەلەكتروندىق ارحيۆتەر، ونوماستيكا، كرەاتيۆتى يندۋستريالار جانە شىعارماشىلىق قىزمەت ناتيجەلەرىن كوممەرتسيالاندىرۋ، اقپارات، مەملەكەت پەن ازاماتتىق قوعامنىڭ ءوزارا ءىس-قيمىلى، ءدىني قىزمەت، مەملەكەتتىك جاستار جانە وتباسى ساياساتى، قوعامدىق سانانى جاڭعىرتۋ، قايىرىمدىلىق، ۆولونتەرلىك قىزمەت، مەدياتسيا، ىشكى ساياسي تۇراقتىلىقتى قامتاماسىز ەتۋ، كونفەسسياارالىق جانە ەتنوسارالىق كەلىسىم، اقپاراتقا قول جەتكىزۋ سالالارىنداعى باسشىلىقتى، سونداي-اق زاڭنامادا كوزدەلگەن شەكتەردە سالاارالىق ۇيلەستىرۋدى جانە مەملەكەتتىك رەتتەۋدى جۇزەگە اسىراتىن قازاقستان رەسپۋبليكاسىنىڭ مەملەكەتتىك ورگانى سانالادى»، - دەلىنگەن ۇكىمەت قاۋلىسىندا.

قۇجاتتا كورسەتىلگەندەي، مينيسترلىكتىڭ قۇرامىنا مىنا ۆەدومستۆولار ەنەدى:

1. ازاماتتىق قوعام ىستەرى كوميتەتى؛

2. اقپارات كوميتەتى؛

3. ارحيۆ، قۇجاتتاما جانە كىتاپ ءىسى كوميتەتى؛

4. ءدىن ىستەرى كوميتەتى؛

5. جاستار جانە وتباسى ىستەرى كوميتەتى؛

6. مادەنيەت كوميتەتى؛

7. ەتنوسارالىق قاتىناستاردى دامىتۋ كوميتەتى.

سونىمەن قاتار قاۋلىعا ساي، مادەنيەت جانە اقپارات مينيسترلىگىنىڭ مىندەتتەرى ايقىندالعان:

- مادەنيەت، سونداي-اق حالىقارالىق مادەني بايلانىستار؛

- تاريحي- مادەني مۇرا وبەكتىلەرىن قورعاۋ جانە پايدالانۋ؛

- كينەماتوگرافيا؛

- مەملەكەتتىك رامىزدەر؛

- ارحيۆ ءىسى جانە باسقارۋدى قۇجاتتامالىق قامتاماسىز ەتۋ؛

- ەلەكتروندىق قۇجات اينالىمى مەن ەلەكتروندىق ارحيۆتەر، ونىڭ ىشىندە تاراتىلۋى شەكتەلگەن قىزمەتتىك اقپارات جانە ونىمەن جۇمىس ىستەۋ؛

- ونوماستيكا؛

- كرەاتيۆتى يندۋستريالار جانە شىعارماشىلىق قىزمەت ناتيجەلەرىن كوممەرتسيالاندىرۋ؛

- بالالاردى ولاردىڭ دەنساۋلىعىنا جانە دامۋىنا زيان كەلتىرەتىن اقپاراتتان قورعاۋ؛

- بۇقارالىق اقپارات قۇرالدارى؛

- ءدىني قىزمەت؛

- مەملەكەتتىك جاستار جانە وتباسى ساياساتى؛

- قوعامدىق سانانى جاڭعىرتۋ؛

- قايىرىمدىلىق؛

- ۆولونتەرلىك قىزمەت؛

- ىشكى ساياسي تۇراقتىلىقتى، كونفەسسياارالىق جانە ەتنوسارالىق كەلىسىمدى قامتاماسىز ەتۋ؛

- مەملەكەتتىڭ، ازاماتتىق قوعامنىڭ جانە قوعامدىق كەڭەستەردىڭ ءوزارا ءىس-قيمىلى.

مينيسترلىكتىڭ جانە وعان باعىنىستى ۆەدومستۆولاردىڭ قاراماعىنا مىنا ۇيىمدار كىرەدى:

- قازاق اۋەندەرى» ا ق؛

- «قازاق گازەتتەرى» ج ش س؛

- قازاق ۇلتتىق حورەوگرافيا اكادەمياسى؛

- قازاقستان رەسپۋبليكاسىنىڭ ۇلتتىق مۋزەيى؛

- «قازاقستان» رەسپۋبليكالىق تەلەراديوكورپوراتسياسى» ا ق؛

- «Qazcontent» ا ق؛

- «قازمەديا ورتالىعى» باسقارۋشى كومپانياسى» ج ش س؛

- «حابار» اگەنتتىگى» ا ق؛

- شاكەن ايمانوۆ اتىنداعى «قازاق فيلم» ا ق.

ۇكىمەت قاۋلىسىنىڭ جوباسى 18-قىركۇيەككە دەيىن كوپشىلىك تالقىلاۋدا بولادى.

ەسكە سالايىق، 1-قىركۇيەكتە مەملەكەت باسشىسىنىڭ جارلىعىمەن 5 جاڭا مينيسترلىك قۇرىلدى.