شيان- الماتى دوستىق ۆەلوشەرۋى قازاقستان شەكاراسىن كەسىپ ءوتتى - فوتو
بۇعان دەيىن قىتايدىڭ قورعاس شەكارا بەكەتىندە قالا اكىمدىگى مەن حالىقارالىق ساۋدا پالاتاسىنىڭ ۇيىمداستىرۋىمەن ۆەلوشاباندوزدارمەن سالتاناتتى قوشتاسۋ ءراسىمى ءوتتى، دەپ حابارلايدى قازاقپارات.
قازاقستاننىڭ شەكارا جانە كەدەن قىزمەتتەرى دوستىق پەن بەيبىتشىلىك ەلشىسى - قىتايلىق سپورتشىلاردى قۇشاق جايا قارسى الىپ، ولاردىڭ ءجۇرىپ وتۋىنە جاسىل ءدالىز ۇيىمداستىردى. قىتاي سپورتشىلارىمەن كەزدەسكەن جۋرناليستەر، جۇرتشىلىق جانە ۆەلوشەرۋدى ۇيىمداستىرۋشىلار ولارعا گۇل شوقتارىن سىيلاپ، سۇحبات الدى. ۆەلوشەرۋگە وسى جەردەن 10 ادامنان تۇراتىن قازاقستاندىق اۋەسقوي ۆەلوشاباندوزدار قوسىلدى، ولاردىڭ ەڭ ۇلكەنى 77 جاستا.
سپورتشىلار قازاقستان اۋماعى ارقىلى اۋدان ورتالىعى جاركەنتكە باراتىن جولدىڭ ءبىرىنشى بولىگىن جىلدام ەڭسەرىپ، وسى كونە قالانىڭ كورىكتى جەرلەرىن ارالادى.
سپورتشىلاردى الدا تاعى 800 شاقىرىم جول كۇتىپ تۇر، ال ۆەلوشەرۋ باعىتى قازاقستانداعى ەجەلگى جىبەك جولىنىڭ كورىكتى جەرلەرى ارقىلى وتەدى، ولار سونداي-اق شارىن شاتقالىنا بارادى.
سيان- الماتى دوستىق ۆەلوشەرۋى وسى جىلدىڭ 1-تامىزىندا ۇلى جىبەك جولىنىڭ بەسىگى سيان قالاسىنان باستاۋ الدى. ول «ءبىر بەلدەۋ، ءبىر جول» باعدارلاماسىنىڭ 10 جىلدىعىنا وراي وتكىزىلىپ وتىر.
ۆەلوسيپەدشىلەر وڭتۇستىك استانا الماتىعا 7-قىركۇيەكتە جەتەدى.
