توقتا، ۆاندال! استانا پوليتسياسى قالا مۇلكىن بۇلدىرمەۋگە شاقىردى - ۆيدەو
ۆانداليزم، عيماراتتار مەن مۇلىكتى ءبۇلدىرۋ - قوعامداعى پروبلەمالاردىڭ ءبىرى. سەبەبى مۇنداي ارەكەتتەر قالانىڭ كوركەيۋىنە كەرى اسەرىن تيگىزەدى. ءتىپتى، شالعاي ايماقتاردان بولەك، ەلوردانىڭ وزىندە پوليتسيا قىزمەتكەرلەرى اتالمىش فاكتىلەرگە ءجيى كۋا بولىپ جاتادى.
ۇستامسىزدىق پەن شەكتەن تىس اگرەسسيانىڭ كورىنىس تابۋى زاڭ مەن ءتارتىپتى بۇزىپ قانا قويماي، اينالاداعىلارعا ايتارلىقتاي زيان نەمەسە شىعىن كەلتىرۋى مۇمكىن. ماسەلەن، 16-تامىز كۇنى تۇنگى ۋاقىتتا استانا تۇرعىنى عيماراتتاردىڭ بىرىنەن شىعىپ كەلە جاتىپ، قۇنى جارتى ميلليون تەڭگەدەن اساتىن ەسىكتى سىندىرعان. ەر ادامنىڭ بۇل ارەكەتى بەينەباقىلاۋ كامەراسىنا ءتۇسىپ قالعان.
مەملەكەت باسشىسى ەلدەگى تۇراقتىلىق پەن قوعامدىق ءتارتىپتى قامتاماسىز ەتۋگە ەرەكشە كوڭىل بولەدى. ونىڭ تاپسىرماسى بويىنشا بيىل ۆانداليزم اكتىلەرى، قوعامدىق جانە جەكە مۇلىكتىڭ ءبۇلىنۋى ءۇشىن جاۋاپكەرشىلىك كۇشەيتىلدى.
«ۆانداليزم، كەيبىر ازاماتتارىمىزدىڭ تارتىپسىزدىگى، مادەنيەتسىزدىگى، نەشە ءتۇرلى تۇرمىستىق جانجالدار ەلىمىزدىڭ حالىقارالىق ارەناداعى ابىرويىنا نۇقسان كەلتىرەتىن بولدى. ءبىزدىڭ نەگىزگى ماقساتىمىز - زاڭدى قاتاڭ ساقتاۋ، قوعامدىق ءتارتىپتى قامتاماسىز ەتۋ»، - دەدى قاسىم-جومارت توقايەۆ ءوزىنىڭ حالىققا جاساعان جولداۋىندا.
قوعامدىق ءتارتىپتى قامتاماسىز ەتۋ ءۇشىن ەلوردا كوشەلەرىنە كۇن سايىن 2500 دەن استام پوليتسيا قىزمەتكەرى مەن ۇلتتىق ۇلاننىڭ اسكەري قىزمەتشىلەرى كەزەكشىلىككە شىعادى. قوعام بەلسەندىلەرى جانە ەرىكتىلەرمەن بىرلەسىپ، تۇراقتى نەگىزدە «توقتا، ۆاندال!» اكسياسى وتكىزىلەدى. «نولدىك توزىمدىلىك» قاعيداتى بويىنشا قوعامدىق ورىنداردا بالاعات سوزدەر ايتقانى، ادامدى قورلاعانى، عيماراتتار مەن وزگە دە نىسانداردى بۇلدىرگەنى جانە قوعامدىق ءتارتىپ پەن ازاماتتاردىڭ تىنىشتىعىن بۇزاتىن باسقا دا وسىنداي ارەكەتتەر ءۇشىن اكىمشىلىك جاۋاپكەرشىلىك، ياعني 15 تاۋلىككە دەيىن قاماۋعا الۋ جازاسى كوزدەلگەن.
«قۇرمەتتى ازاماتتار! سىزدەردى قوعامدىق ءتارتىپتى ساقتاۋعا جانە قالا مۇلكىنە ۇقىپتى بولۋعا شاقىرامىز. كەز كەلگەن قۇقىق بۇزۋشىلىق انىقتالىپ، سوڭى جاۋاپكەرشىلىككە اكەلەتىنىن ۇمىتپاڭىزدار! ىشكى ءتارتىپ، زاڭعا جانە باسقا ادامداردىڭ قۇقىقتارىنا قۇرمەتپەن قاراۋ - بۇل قازاقستاندىق قوعام ۇمتىلۋعا ءتيىس نورمالار»، - دەدى استانا قالاسى پ د پاترۋلدىك پوليتسيا پولكىنىڭ ينسپەكتورى ەرنات قوڭىرباي.
