تانىمال ءانشى بوزجىرا شاتقالىندا بەينەبايان ءتۇسىردى
ازيزا ماڭعىستاۋ وبلىسىندا تۇسىرىلگەن «Silk Sound» اتتى بەينەروليگىن Instagram جەلىسىندەگى پاراقشاسىندا جاريالادى. ول ءوزىنىڭ جازباسىندا مۇنداي فورماتتاعى ۆيدەونى ءبىرىنشى رەت تۇسىرگەنىن ايتقان.
«وتە اسەم تابيعات، ەرەكشە جەر. ءوزىمنىڭ بۇكىل سەزىمىمدى مۋزىكا ارقىلى جەتكىزگىم كەلدى. سىزدەر دە سول سەزىمدى سەزىنەسىزدەر دەگەن ويدامىن»، - دەدى ول.
ال، الەۋمەتتىك جەلى قولدانۋشىلارى اۋەننىڭ ۇيالى تەلەفون رينگتونىنا ۇقسايتىنىن جازعان.
ماڭعىستاۋ وبلىسى تۋريزم باسقارماسىنىڭ باسشىسى ماۋلەن عابدۋلقاليەۆ جاڭا روليكتىڭ ايماق تۋريزمىن دامىتۋعا ۇلەس قوساتىن جاڭا قادام ەكەنىن ايتادى.
«ينستاگرام جەلىسىندە كۇندەلىكتى قارالىم جيناپ جاتقان DJ Azi Ray لاقاپ اتىمەن تانىمال ازيزانىڭ بەينەروليگىندە بوزجىرا شاتقالى كوپشىلىكتىڭ نازارىنا ىلىنگەنى ءسوزسىز. سوندىقتان دا، مۇنداي ۆيدەولار، كليپتەر تۋريزم سالاسىن دامىتۋعا پايدالى»، - دەدى ول.
وسى ورايدا، باسقارما باسشىسى ءوڭىرىمىزدىڭ وڭتۇستىك جانە سولتۇستىك باعىتىندا 200-گە جۋىق تاريحي- مادەني ورىن بار ەكەنىن ايتىپ ءوتتى.
«ساياحاتشىلار كوبىنە تۇبەكتىڭ وڭتۇستىك بەتكەيىنە ساياحات جاسايدى، ياعني تۋريستەر «بەكەت اتا» جەراستى مەشىتى مەن بوزجىرا شاتقالىنىڭ تۇمسا تابيعاتىن كورۋگە ارنايى نيەت ەتىپ بارادى. جالپى، وڭىردە 13 مىڭنان استام تاريحي- مادەني، ولكەتانۋ ەسكەرتكىشتەرى بار، ياعني مادەنيەت سالاسىنا ءبىزدىڭ تۋريستىك نىسانداردىڭ قوسار ۇلەسى مول»، - دەدى ماۋلەن عابدۋلقاليەۆ.
اۆتور:
ينديرا ساتەنباي
