پانفيلوۆ ديۆيزياسىنىڭ سوڭعى جاۋىنگەرى ومىردەن ءوتتى
قايىرلى ۋاتاي ۇلى جونقابايەۆ 1921 -جىلى 10- قىركۇيەكتە شىعىس قازاقستان وبلىسى سامار اۋدانىندا دۇنيەگە كەلگەن. ەڭبەك جولىن 1940 -جىلى ش ق و قۇلجا ورتا مەكتەبىندە مۇعالىم بولىپ باستاعان. 1941 -جىلى قازان ايىندا پانفيلوۆ ديۆيزياسىنىڭ 23- گۆارديالىق پولكىنە قىزىل اسكەر جاۋىنگەرى بولىپ الىندى.
ارداگەر سوعىسقا باسىنان اياعىنا دەيىن قاتىسقان. 8-گۆارديالىق اتقىشتار ديۆيزياسى قۇرامىندا پۋلەمەتشى بولعان، كەڭەس وداعىنىڭ باتىرى مالىك عابدۋللينمەن ءبىر روتادا بولعان، بەلورۋسسيا، پولشا، ەستونيانى ازات ەتۋگە قاتىسقان. 1943 -جىلى اقپاندا رجيەۆتەگى قاندى مايداندا اۋىر جارالانعان، جەڭىستى درەزدەندە قارسى الدى.
سوعىستان كەيىن سامار اۋداندىق اتقارۋ كوميتەتىندە ءبولىم مەڭگەرۋشىسى بولىپ ىستەدى. ءارى قاراي اۋداندىق تۇتىنۋشىلار وداعىنىڭ جۇيەسىندە باسشىلىق لاۋازىمدارىندا بولعان. 1970 - 1983 ج. ج. الماتىداعى وبشەپيت جۇيەسىندە شارۋاشىلىق ەسەپتەرىنىڭ ديرەكتورى بولدى. 1983 -جىلى قۇرمەت دەمالىسىنا شىقتى، بەس بالا تاربيەلەپ ءوسىردى.
ۇلى وتان سوعىسىندا كورسەتكەن ەرلىكتەرى ءۇشىن «قىزىل جۇلدىز»، جانە Ⅱ دارەجەلى «وتان سوعىسىنىڭ» وردەنىمەن، «ەرلىگى ءۇشىن»، «ماسكەۋدى قورعاعانى ءۇشىن» مەدالدارىمەن جانە باسقا دا كوپتەگەن مەدالدارمەن ماراپاتتالعان.
«قارت جاۋىنگەر بۇگىن جەر قوينىنا بەرىلدى. الماتى ماڭىنداعى بورالداي زيراتىندا جاتقان بايبىشەسىنىڭ قاسىنان ماڭگىلىك ورىن الدى. اتانى سوڭعى ساپارعا شىعارىپ سالۋشىلار اراسىندا ۇلتتىق ۇلان قولباسشىلىعى مەن ارداگەرلەرى بولدى. قارالى ميتينگىدە قايىرلى ۋاتاي ۇلىنىڭ تۋىستارى اتاعا ءاردايىم كورسەتىپ كەلگەن سىي- قۇرمەتتەرى جانە جەرلەۋ ءراسىمىن ۇيىمداستىرعانى ءۇشىن اسكەريلەرگە العىس ءبىلدىردى»، - دەپ حابارلادى ۇلتتىق ۇلاننىڭ باسپا ءسوز قىزمەتى.
ەسكە سالساق، ارداگەر اقساقالدان 100 جاسقا تولعان جىلى سۇحبات العان ەدىك. ول ءوزىنىڭ ءومىرى، قان مايداندا باستان كەشكەن وقيعالارىن، جەڭىس كۇنىن قايدا قارسى العانى، سوعىستان كەيىنگى عيبراتتى عۇمىرى جايىندا ايتىپ، اق باتاسىن بەرگەن ەدى.
ەكىنشى دۇنيەجۇزىلىك سوعىس ارداگەرى قايىرلى جونقابايەۆتىڭ وتباسى مەن تۋعان- تۋىستارىنا كوڭىل ايتا وتىرىپ، اتامىزدىڭ جاتقان جەرى جارىق، جانى جۇماقتا بولسىن دەپ تىلەيمىز.
اۆتور:
دۋمان ارعىنگەلدى
