ەلىمىزدە ات سپورتىنىڭ جاڭا ءتۇرى پايدا بولدى
بۇل - العاش رەت 2022 -جىلى وتكەن «ۇلى دالا جورىعى» مارافون- بايگەسىنىڭ ناتيجەسى، دەپ حابارلايدى قازاقپارات «ۇلى دالا جورىعى» مارافون- بايگەسىنىڭ ۇيىمداستىرۋ كوميتەتىنە سىلتەمە جاساپ.
قازاقستاندا تاي- بايگە، قۇنان- بايگە، الامان بايگە، جورعا بايگە سەكىلدى ات جارىسىنىڭ بىرنەشە ءتۇرى بەلگىلى. الايدا، ولاردىڭ بىرەۋى دە جورىق سياقتى ۇزاق قاشىقتىققا سوزىلمايدى.
2022 -جىلى «ۇلى دالا جورىعى» مارافون- بايگەسىنىڭ العاش ماۋسىمى ءوتتى. بۇل وقيعا ات سپورتى الەمىندەگى ناعىز جاڭالىق بولدى. ءبىرىنشى مارافوننىڭ قاشىقتىعى - 1200 شاقىرىم. ونىڭ قاشىقتىعى مەن قيىندىعىنا قاراماستان، 95 تۇلپاردىڭ 26-سى ويداعىداي مارەگە جەتتى. بۇل جەتىستىك جورىقتىڭ ومىرشەڭدىگىن دالەلدەپ، الەمدىك ات سپورتىنا وزىندىك جاڭاشىلدىق ەنگىزىپ وتىر.
موڭعوليادا وسىنداي ات مارافونى وتكىزىلەتىنى بەلگىلى. الايدا، وندا قاشىقتىق - 1000 شاقىرىم. بۇل رەتتە ءار 40 شاقىرىم سايىن جىلقى اۋىستىرىلىپ وتىراتىنىن ەسكەرگەن ءجون. ال ءبىزدىڭ جاعدايدا مارافون قاشىقتىعىنىڭ جارتىسى - 650 شاقىرىمنان كەيىن ءبىر رەت قانا ات اۋىستىرۋ رۇقسات ەتىلەدى. بۇل تاعى ءبىر مارتە قازاق جىلقىلارىنىڭ ەرەكشە توزىمدىلىگىن راستايدى.
قازاقستاندا جورىق بيىل ەرەكشە نازار اۋدارۋعا لايىق. سەبەبى، بۇل ماۋسىمدا قاشىقتىق 1300 شاقىرىم بولادى. شاباندوزدار استانادان تۇركىستانعا دەيىنگى باعىتتى 14 كۇن ىشىندە ءوتۋى ءتيىس. بۇل مىندەتتى از ۋاقىت ىشىندە ورىنداپ شىعاتىن كوماندا «ۇلى دالا جورىعى» مارافون- بايگەسىنىڭ ابسوليۋتتى جەڭىمپازى اتانادى.
«ۇلى دالا جورىعى-2023» مارافون- بايگەسىنىڭ ماۋسىمى 3 كۇننەن كەيىن - 6 -قىركۇيەكتە ساعات 14:00-دە قاراجار (يلينكا) اۋىلىندا باستالادى. بۇل تەك ات سپورتى جانكۇيەرلەرىنىڭ عانا ەمەس، سونداي- اق جاڭا سىن- تەگەۋرىندەر مەن ەموتسيالارعا قۇشتار قازاقستاندىقتاردىڭ دا نازارىن وزىنە اۋداراتىن تىڭ وقيعا بولماق.
