جاڭا ىشكى ىستەر ءمينيسترى جايىندا نە بىلەمىز

استانا. قازاقپارات - پرەزيدەنت جارلىعىمەن ىشكى ىستەر ءمينيسترى بولىپ تاعايىندالعان ەرجان سادەنوۆ - شىعىس قازاقستان وبلىسى، كۇرشىم اۋدانىنىڭ تۋماسى. قازاقپارات جاڭا ءمينيستردىڭ بۇگىنگە دەيىن ءجۇرىپ وتكەن ەڭبەك جولىنا شاعىن شولۋ جاسادى.

ەرجان ساپاربەك ۇلى سادەنوۆ 1968 -جىلدىڭ 24 -قازانىندا شىعىس قازاقستان وبلىسى كۇرشىم اۋدانىنىڭ قۇيعان اۋىلىندا دۇنيەگە كەلگەن.

سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىن، قاراعاندىداعى ق ر ۇ ق ك جوعارى مەكتەبىن بىتىرگەن.

قۇقىق قورعاۋ سالاسىنداعى ەڭبەك جولىن 1993 -جىلى ش ق و ىشكى ىستەر باسقارماسىنىڭ اۋدانارالىق جەدەل ىزدەستىرۋ بولىمىندە جەدەل ۋاكىل رەتىندە باستاعان.

قىزمەت جولىندا وسكەمەن قالاسىندا اۆتوكولىك ۇرلىعىنا قارسى بولىمشەلەردى باسقارىپ، مۇلىككە قارسى قىلمىستار مەن ناشاقورلىق دەرەكتەرىن اشۋمەن اينالىستى.

سونداي- اق، شىعىس قازاقستان وبلىسى ىشكى ىستەر باسقارماسىنىڭ اسا ماڭىزدى ىستەر جونىندەگى ءبولىمنىڭ، اسا ءقاۋىپتى قىلمىستارمەن كۇرەس جونىندەگى ءبولىمنىڭ، ازاماتتارعا قارسى قىلمىستار ءبولىمىنىڭ باستىعى بولدى.

كەيىن شىعىس قازاقستان وبلىسىنىڭ اۋداندىق پوليتسيا بولىمدەرىن، ريددەر قالاسى ىشكى ىستەر ءبولىمىن، وسكەمەن قالاسى ىشكى ىستەر باسقارماسىن باسقاردى.

وبلىستىق دەڭگەيدە ماڭعىستاۋ وبلىسى ىشكى ىستەر دەپارتامەنتى باستىعىنىڭ ورىنباسارى، ىشكى ىستەر مينيسترلىگى دەپارتامەنتىنىڭ باستىعى، كولىكتەگى ىشكى ىستەر دەپارتامەنتىنىڭ باستىعى، اقمولا وبلىسىنىڭ پوليتسيا دەپارتامەنتىنىڭ باستىعى، استانا قالاسى پوليتسيا دەپارتامەنتىنىڭ باستىعى لاۋازىمىندا قىزمەت ەتتى.

مينيسترلىك لاۋازىمعا تاعايىندالعانعا دەيىن ىشىكى ىستەر ءمينيسترىنىڭ ورىنباسارى قىزمەتىن اتقارعان.

قاڭتار وقيعاسى كەزىندە ەرجان سادەنوۆ استانا قالاسىنىڭ پوليتسيا دەپارتامەنتىن باسقاردى.

9 -قاڭتاردا ول ەلوردانىڭ تۇگەلدەي پوليتسيا باقىلاۋىندا ەكەنىن مالىمدەگەن ەدى.

ءمينيستردىڭ ورىنباسارى لاۋازىمىندا ءجۇرىپ، مامىر ايىندا ءماجىلىس دەپۋتاتتارىنىڭ الدىندا «قازاقستان رەسپۋبليكاسىنداعى ادام ساۋداسىنا قارسى ءىس- قيمىل تۋرالى» زاڭ جوباسىن تانىستىرعانى بار.

اۆتور: ەسىمجان ناقتىباي