شەتەل بانكتەرىنىڭ كەلۋىنەن تۇتىنۋشى پايدا كورۋى كەرەك - قارجى ساراپشىسى
«بانك - قارجىلىق دەلدال. بانكتەر ءبىزدىڭ نارىقتى وتە جاقسى بىلەدى. ەلىمىزگە كەلەتىن شەتەلدىك بانكتەر تەك كورپوراتيۆتىك نەسيەلەندىرۋدە ءوز ورنىن تابا الادى. ەگەر ءىرى بانكتەر بولسا جانە ولار ەلدەردە بولاتىن قارجى تاۋەكەلدەرىن قابىلداۋعا دايىن بولسا، وندا قازاقستاندا جۇمىس ىستەسىن»، - دەدى راسۋل رىسمامبەتوۆ اگەنتتىك تىلشىسىنە بەرگەن سۇحباتىندا.
ودان ءارى مامان شەتەلدەن كەلەتىن بانكتەردىڭ جۇمىس ىستەۋ مەحانيزمدەرى تۋرالى ايتىپ بەردى.
«بۇل دەگەنىمىز قازاقستان نارىعىنا 3 بانك جاي عانا كەلەدى دەگەن ءسوز ەمەس. مەنىڭ تۇسىنگەنىم، ولار «بەرەكە» بانكتىڭ نەمەسە جۋسان بانكتىڭ بەلگىلى ۇلەسىن ساتىپ الادى. قازاقستاندا كەم دەگەندە 2-3 بانكتى ساتۋعا دايىنداپ جاتقانىن بىلەمىن جانە بۇل پرەزيدەنتتىڭ ايتقانىمەن سايكەس كەلەدى. ءبىزدىڭ بانكتەر باسەكەلەستىككە توتەپ بەرە الادى. بۇعان كۇمانىم جوق، كەز كەلگەن جاعدايدا تۇتىنۋشى ودان پايدا كورۋى كەرەك، مەنىڭ ويىمشا، سولاي بولادى دا»، - دەيدى ول.
سونداي-اق ساراپشى بيزنەس ءۇشىن ەسەپ بەرۋدى جەڭىلدەتۋ ماسەلەسىن كوتەردى.
«مەن ءوزىم جەكە سەكتوردانمىن. ءار توقسان سايىن بۋحگالتەرياعا بىرەسە مىنا فورما، كەلەسى جولى باسقا فورمامەن تولتىر دەپ تالاپ ەتەدى. سونىمەن قاتار ەسەپ فورماسىنىڭ ىشىندە بوس باعاندار كوپ. ول مالىمەتتەردىڭ ءبارى وڭدەلەدى، تالدانادى، بۇل كاسىپورىنداردىڭ تيىمدىلىگىن انىقتاۋ ءۇشىن قاجەت. ءبىراق سالىقتاردى باسقارۋ تەك مەملەكەتتىك ورگاندار ءۇشىن عانا ەمەس، بيزنەس ءۇشىن دە وتە قيىن. سوندىقتان قاعاز تولتىرۋدى ازايتىپ، ەلەكتروندى فورماتقا كوشكىمىز كەلەدى. الايدا مەنىمشە، بۇل جەردە پروبلەما بار، ەلىمىزدە دەرەكتەردى وڭدەۋ ورتالىقتارى جەتىسپەيدى. وسى ورايدا ءبىز تسيفرلىق ەكونوميكاعا بەت بۇرامىز دەسەك، دەرەكتەردى وڭدەۋ ورتالىقتارىن كوبىرەك اشىپ، جالپى پروتسەستى جەڭىلدەتۋ قاجەت. كەيبىر بانكتەر ميكرو جانە شاعىن بيزنەس ءۇشىن ەسەپتى تەز تولتىرۋدىڭ قاراپايىم جولىنا كوشتى. وسىعان بايلانىستى سالىق ورگاندارىنىڭ ارەكەتىن كۇتەمىز»، - دەپ تولىقتىردى راسۋل رىسمامبەتوۆ.
