ءمادينا ءابىلقاسىموۆا تولەم قابىلەتىن جوعالتقان بانكتەردى قۇتقارۋ قالاي وزگەرەتىنىن ءتۇسىندىردى
«كەيىنگى ءبىر جىلدا زاڭنامالىق باستامالاردىڭ تولەم قابىلەتىن جوعالتقان بانكتەردىڭ جۇمىسىن رەتتەۋ باعىتىندا باستامالار پاكەتىن ازىرلەپ جاتىرمىز. ياعني، ەگەر بانك تولەم قابىلەتى جوق دەپ تانىلسا، ونىڭ جۇمىسىن رەتتەۋدىڭ ناقتى تەتىكتەرى بولۋى كەرەك. بۇل سول بانككە اقشا سالعان سالىمشىلاردىڭ مۇددەسىن قورعاۋ ءۇشىن كەرەك. قازىر وسى پروتسەدۋراداعى مەملەكەتتىڭ، بانك اكسيونەرىنىڭ ءرولى بارىنشا ناقتى جازىلىپ جاتىر.
بۇعان دەيىن بانكتەردى قۇتقارۋ ءۇشىن بيۋجەت اقشاسى پايدالانىلىپ كەلگەنىن بىلەسىزدەر. اكسيونەرلەردىڭ جاۋاپكەرشىلىگى تولىق بەكىتىلمەگەن ەدى. ءبىزدىڭ مىندەت - بانك ارقالايتىن شىعىننىڭ ءبارىن ءبىرىنشى كەزەكتە اكسيونەردىڭ ەسەبىنەن وتەتۋ. ياعني، زاڭدا وسى پروتسەدۋرا ايقىن جازىلادى»، - دەدى ول.
اگەنتتىك باسشىسى مۇنداي بانكتەردى مەملەكەت ەسەبىنەن قۇتقارۋ تەتىگى مۇلدەم الىنىپ تاستالمايتىنىن ايتادى.
«ەگەر مەملەكەتتەن كومەك كورسەتۋ كەرەك دەگەن شەشىم قابىلدانسا، ناقتى قانداي جاعدايلاردا قولداۋ كورسەتىلەتىنى ناقتى جازىلۋى كەرەك. مىسالى، ول جۇيەقۇراۋشى بانك بولسا، اكسيونەر شىعىندى بارىنشا ءوز ەسەبىنەن جاۋىپ، قالعان شىعىندى جابۋعا مەملەكەت قاتىسۋى مۇمكىن دەگەن سياقتى. بۇل سالىمشىلار مەن مەملەكەتتىڭ مۇددەسىن بارىنشا قورعاۋ ءۇشىن كەرەك. ءبىز ءتيىستى زاڭ جوباسىن جىل اياعىنا دەيىن پارلامەنتكە ەنگىزبەكشىمىز»، - دەدى ءمادينا ءابىلقاسىموۆا.
