جەرگىلىكتى بيۋجەتتى باسقارۋ قۇقىعى اۋدان اكىمدەرىنىڭ جاۋاپكەرشىلىگىن ارتتىرا تۇسەدى - ەركىن تۇقىموۆ
ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ وسىعان قاتىستى پىكىر ءبىلدىردى، دەپ حابارلايدى قازاقپارات ءتىلشىسى.
«بۇل - اۋدان اكىمدەرى ءۇشىن ءوزىن-ءوزى باسقارۋ جۇيەسىندە مۇمكىندىك بەرەتىن ماڭىزدى قادام. اكىمدەرگە اۋدان قاراجاتىن جۇمساعاندا ورتالىق ورگانداردىڭ سان كەلىسىمىن الۋدىڭ قاجەتى جوق. ونىڭ ۇستىنە، اكىم جەرگىلىكتى ماسەلەلەرمەن جاقسى تانىس. مەكتەپ سالۋ كەرەك پە، ەمحانا سالۋ كەرەك پە؟.. ونداي شەشىمدەردى قابىلداعاندا ۇزىن-سونار كەلىسىم جاساۋ ءتيىمسىز. قارجىنى باسقارۋعا كەلگەندە ورتالىقتاندىرىلعان جۇيەگە تاۋەلدى بولمايدى»، - دەدى ەركىن تۇقىموۆ.
ينستيتۋت باسشىسىنىڭ ايتۋىنشا، قارجىنى باسقارۋ قۇقىعىن بەرۋ اۋدان اكىمدەرىنىڭ ەركىن بولىپ، ءوز بەتىنشە شەشىمدەر قابىلداۋىنا مۇمكىندىك بەرەدى.
«ءبىر جاعىنان بۇل قۇرال اۋدان اكىمدەرىنىڭ حالىق الدىنداعى جاۋاپكەرشىلىگىن ارتتىرا تۇسەدى. بۇل - دەموكراتيالىق پراكتيكا»، - دەيدى ول.
ايتا كەتسەك، مەملەكەت باسشىسى قازاقستان حالقىنا جولداۋىندا اۋدان اكىمدەرىنە جەرگىلىكتى بيۋجەتتى باسقارۋ قۇقىعىن بەرۋدى ۇسىنعان ەدى.
«اۋدان اكىمدەرىنە جەرگىلىكتى بيۋدجەتتى باسقارۋ قۇقىعىن بەرگەن ءجون دەپ سانايمىن. بۇل - ەڭ الدىمەن، سول جەردەگى ماسەلەلەردى جەدەل شەشۋ ءۇشىن قاجەت. بۇدان بولەك، جەرگىلىكتى بيۋجەتكە جينالاتىن سالىققا قاتىستى جەڭىلدىكتەردى انىقتاۋ قۇقىعىن ايماقتاردىڭ وزىنە بەرۋ ماسەلەسىن قاراستىرۋ كەرەك. بۇل شارا بيزنەستىڭ دامۋىنا ۇلكەن سەرپىلىس اكەلمەك. ۇسىنىلىپ وتىرعان باستاما وتە ماڭىزدى. كەلەشەكتە ايماقتاردىڭ تابىستى دامۋىنا ايرىقشا ىقپال ەتەدى. سول سەبەپتى، بارلىق اكىم بيۋجەتارالىق قاتىناستاردىڭ جاڭا ۇلگىسىنە كوشۋ كەزىندە ونىڭ ءبىرتۇتاس مەملەكەتىمىزگە تيگىزەتىن پايداسى جانە تيىمدىلىگى تۋرالى ويلاۋى كەرەك»، - دەدى پرەزيدەنت.
