مەملەكەت باسشىسى قولعا العان ساياسات بارشاعا تەڭ مۇمكىندىك بەرۋگە باعىتتالعان - ماۋلەن اشىمبايەۆ
بۇل تۋرالى جالپى وتىرىستا سەنات ءتوراعاسى ماۋلەن اشىمبايەۆ ايتتى، دەپ حابارلايدى قازاقپارات ءتىلشىسى.
«جولداۋ ءاردايىم ەل دامۋىنىڭ باسىم باعىتتارى مەن الداعى ماقسات-مىندەتتەردى ايقىنداپ بەرۋىمەن ماڭىزدى. بۇل جولى مەملەكەت باسشىسى ەلىمىزدەگى ەكونوميكالىق ساياساتتىڭ جاڭا مودەلىن قالىپتاستىرۋعا باسىمدىق بەردى. وزدەرىڭىزگە بەلگىلى، بۇگىنگى الەمدەگى كۇردەلى احۋال مەملەكەتتەردىڭ دامۋىنا اسەرىن تيگىزۋدە. وسىنداي قيىن كەزەڭدە پرەزيدەنتىمىز حالىقتىڭ تۇرمىس ساپاسىن ارتتىرۋعا اسا ءمان بەرىپ وتىر. جولداۋدا جاڭا ەكونوميكالىق ساياساتتىڭ ناقتى ءارى ءتيىمدى تەتىكتەرى انىقتالدى. شاعىن جانە ورتا كاسىپكەرلىكتى قولداۋدىڭ جۇيەلى مەحانيزمدەرى كورسەتىلدى. بارىنە بىردەي تۇسىنىكتى، اشىق، ادىلەتتى سالىق ساياساتىن قامتاماسىز ەتۋ قاجەتتىگى ايتىلدى. ينۆەستيتسيا تارتۋ ءۇشىن قولايلى بيزنەس-كليمات قالىپتاستىرۋعا ۇلكەن ءمان بەرىلدى»، - دەپ توقتالدى ماۋلەن اشىمبايەۆ.
سەنات ءتوراعاسى جولداۋدا ايقىندالعان مىندەتتەردى ورىنداۋ ءۇشىن سەنات دەپۋتاتتارى تاراپىنان بارىنشا قولداۋ كورسەتىلەتىنىن ءمالىم ەتتى.
«مەملەكەت باسشىسى قولعا الىپ وتىرعان ساياسات حالىقتىڭ ءال-اۋقاتىن ارتتىرۋعا جانە بارشاعا تەڭ مۇمكىندىك بەرۋگە باعىتتالعان. ياعني، بۇل باستامالار ادىلەتتىلىك قاعيدالارىنىڭ بارلىق سالا جۇزەگە اسۋىنا مۇمكىندىك جاسايتىنى ءسوزسسىز»، - دەپ تۇيىندەدى ماۋلەن اشىمبايەۆ.
