قازاقستاندا حالال ونىمدەر نارىعى زاڭمەن رەتتەلۋى مۇمكىن
ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى قۋانىش ەلىكبايەۆ قوعام اراسىندا «حالال» بەلگىسى بار تاۋاردىڭ ساپاسىنا بايلانىستى سۇراق ءجيى قويىلاتىنىن ايتادى.
«اشىق ايتايىق، قازىر بۇل سالا ەرىكتى، زاڭدارمەن تىكەلەي رەتتەلمەيدى. جاناما تۇردە ءبىزدىڭ دەنساۋلىق ساقتاۋ مينيسترلىگىندەگى ارىپتەستەرىمىز مونيتورينگ شەڭبەرىندە كەيدە سول شوشقا ەتىنىڭ مالىمدەلمەگەن كومپونەنتتەرىن انىقتايدى جانە تاڭبالاۋ بولىگىندە تەحرەگلامەنت تالاپتارىن بۇزعانى ءۇشىن ايىپپۇل سالادى. قولدانىستاعى سەرتيفيكاتتاۋ ورگاندارى دا ءوندىرىستى باقىلاۋدى جۇزەگە اسىرادى.
جالپى، قازاقستاندا حالال ينفراقۇرىلىمىن قۇرۋ مەن دامىتۋدى ەسكەرە وتىرىپ، ءبىز مالىمدەلمەگەن قۇرامداس بولىكتەرگە عانا ەمەس، سونىمەن قاتار ءوندىرىستىڭ بارلىق ينفراقۇرىلىمى مەن پروتسەستەرىنە ءتيىستى باقىلاۋ بولۋى ءۇشىن وسى ماسەلەلەردى زاڭنامالىق دەڭگەيدە رەتتەۋدى ۇسىنعان ءجون دەپ سانايمىز»، - دەدى سپيكەر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
وسىلايشا تەك ءونىم قۇرامىن عانا ەمەس، ءوندىرىس پروتسەسى مەن ينفراقۇرىلىمىن دا باقىلاۋدا ۇستاۋ ۇسىنىلىپ وتىر.
ۆەدومستۆونىڭ دەرەگىنشە، قازاقستاندا «حالال» ستاندارتىن الۋعا قاۋقارلى 4 مىڭنان استام ءوندىرۋشى بار. ولار تاماق ونەركاسىبى، توقىما جانە باسقا دا سالالاردا ەڭبەكتەنەدى.
«ساراپشىلاردىڭ باعالاۋىنشا، ەلدەگى سويىلعان ەتتىڭ 70-75 پايىزى، وڭدەلگەن ەتتىڭ 65 پايىزى حالال ءونىم رەتىندە ساتىلىپ كەلەدى»، - دەدى قۋانىش ەلىكبايەۆ.
ونىڭ سوزىنشە، حالال ونىمدەردىڭ جاھاندىق نارىعى قازىر 3 تريلليون دوللارعا جەتكەن. بۇل كورسەتكىش 2028-جىلعا قاراي 11 تريلليون دوللاردى قۇراۋى ىقتيمال.
2023-جىلدىڭ قاڭتار-ماۋسىمىندا عانا قازاقستان 83 ميلليون دوللاردىڭ ەت جانە ەت ونىمدەرىن ەكسپورتتاعان.
ەلىمىزدە حالال ستاندارتىن انىقتايتىن 18 ۇلتتىق ستاندارت قابىلدانىپ، ت م د ەلدەرى ءۇشىن مەملەكەتارالىق ستاندارتتارىنىڭ 11 جوباسى ازىرلەنگەن.
قازاقستاندا بارلىعى تاماق ونىمدەرىنە ارنالعان ءبىرىڭعاي تەحرەگلامەنت بويىنشا 100 دەن استام زەرتحانا اككرەديتتەلگەن. ولاردىڭ 37- كومپونەنتتەردىڭ، ونىڭ ىشىندە شوشقا ەتىنىڭ د ن ق- سىن انىقتاي الادى.
