شەتتەگى قازاق وتباسىنىڭ ىزگىلىگى: «بوران» فيلمى پروكاتقا شىقتى
كوركەم تۋىندى ومىردە بولعان وقيعاعا نەگىزدەلگەن - وتكەن عاسىردىڭ 80- جىلدارى، كەڭەس زامانىندا جاس جىگىت شۇعىل كورشى اۋىلعا اتتانادى. بوراندى كۇنى اداسىپ كەتكەن جاس جىگىت قىتاي شەكاراسىنان اسىپ وتكەنىن بايقاماي قالادى. سول ساتتەن باستاپ تاعدىر تالكەگىنە ۇشىراپ، قيىن ساتتەردى باستان كەشەدى. ابايسىزدا جاساعان «قىلمىسى» ءۇشىن سول زاماندا كەڭەس تۇرمەسىندە كەمىندە 5 جىل وتىرۋى مۇمكىن بولسا، قىتايدا ءتىپتى اتۋ جازاسى كۇتىپ تۇر ەدى. وعان قىتايداعى قازاق وتباسى كومەك قولىن سوزادى.
سەناري اۆتورى جانە پروديۋسەرى ەربول بورانشىنىڭ ايتۋىنشا، فيلمنىڭ ماقساتى قايدا جۇرسە دە قازاقتىڭ قانى ءبىر ەكەنىن جانە ىزگىلىكتە شەكارا بولمايتىنىن كورسەتۋ.
«بۇل جوبانى ءسابيت قۇرمانبەكوۆ اعامىزبەن بىرگە 2015-جىلدان باستاپ قولعا العان بولاتىنبىز. قىتايعا اداسىپ ءوتىپ كەتكەن جىگىتتى حال ۇستىندە جاتقاندا سول جاقتاعى قازاقتىڭ ۇلكەن اقساقالى تاۋىپ الادى دا، قۇتقارىپ، وسى بالا ءۇشىن ەرلىككە بارادى. وزىنە دە تونگەن قاتەرگە قاراماي، شەكارادان قايتا وتكىزىپ جىبەرۋگە كومەكتەسەدى. بۇل وقيعا ارقىلى قازاقتىڭ قايدا جۇرسە دە ەلىم-جەرىم دەپ سوققان جۇرەگى ءبىر ەكەنىن تۇسىنۋگە بولادى. سونداي-اق ادامگەرشىلىكتى، باۋىرمالدىقتى ەشقانداي شەكارا بولە المايتىندىعىن ايتقىمىز كەلدى. جالپى كينونى تۇسىنەتىن جانە ۇلتجاندى، جۇرەگى قازاق دەپ سوعاتىن ازاماتتاردىڭ بارلىعىنا قىزىقتى، اسەرلى بولادى دەپ ويلايمىن»، - دەيدى ەربول بورانشى.
بەلگىلى سەناريست اقىن، دراماتۋرگ ۇلاربەك نۇرعالىم ۇلى كوركەم تۋىندىنىڭ كورەرمەنگە بەرەرى كوپ ەكەندىگىن ايتادى.
«قاراپايىم كورىنىستەر، دەتالدار ارقىلى ۇلكەن دۇنيەنى جەتكىزە بىلگەن. ۇڭگىردە كەزدەسكەن ادام سۇيەكتەرى ارقىلى قازاقتىڭ قاسىرەتتى تاريحىن كوز الدىمىزعا اكەلسە، سوڭىنداعى ەسكى اعاش كوپىر ارقىلى قىل كوپىردىڭ ۇستىندە تۇرعانداي قازاقتىڭ تاعدىرىن بەينەلەۋى ەرەكشە شەبەرلىك دەپ بىلەمىن. بۇدان باسقا دا كوڭىلگە ۇلكەن وي سالارلىق دۇنيەلەر جەتەرلىك»، - دەيدى ۇلاربەك نۇرعالىم ۇلى.
ايتا كەتەيىك تۋىندى مادەنيەت جانە سپورت مينيسترلىگىنىڭ تاپسىرىسى بويىنشا «بوران» ستۋدياسىندا تۇسىرىلگەن.
كينوتۋىندى بۇگىننەن باستاپ قازاقستاننىڭ بارلىق كينوتەاترلارىندا پروكاتقا شىقتى.
