بالانىڭ باسىندا ءبيت بار ەكەنىن قالاي بىلۋگە بولادى؟

استانا. قازاقپارات - ءبيت - ادامنىڭ باسىنىڭ تەرىسىندە ءومىر سۇرەتىن جانە كۇنىنە بىرنەشە رەت باس تەرىسىنەن قان ىشەتىن قاناتى جوق جاندىكتەر.

بيتتەردىڭ ومىرلىك تسيكلى ءۇش كەزەڭنەن تۇرادى: سىركە (جۇمىرتقا)، سىركەدەن شىعاتىن دەرناسىل جانە ۇلكەن ءبيت. بيتتەر ۇشا دا، سەكىرە دە المايدى، ءبىراق تىعىز بايلانىس كەزىندە ءبىر باستان ەكىنشى باسقا كوشە الادى. سونداي-اق ول ءجيى بىرەۋدىڭ تاراعى جانە باس كيىمى ارقىلى جۇعادى. ءبيت گيگيەنا ساپاسىنا قاراماستان، كەز كەلگەن ادامدا پايدا بولۋى مۇمكىن.

قانداي بەلگىلەردەن ءبيتتىڭ بار ەكەنىن بىلۋگە بولادى؟

ءبيتتىڭ بار ەكەنىن بىلدىرەتىن كەڭ تاراعان بەلگى - باستىڭ قىشۋى. ادەتتە، بالالار قۇلاق ارتىنىڭ نەمەسە مويىننىڭ ارتقى جاعىنىڭ قىشيتىنىن ايتادى. ءتىپتى، ءبيتتى العاننان كەيىن دە قىشۋ ءبىراز ۋاقىتقا دەيىن جالعاسۋى مۇمكىن.

سونداي-اق مىناداي بەلگىلەر بولۋى مۇمكىن:

قاتتى قىتىق سەزىمى نەمەسە باستا قوزعالىس سەزۋ؛

اشۋلانشاقتىق؛

ۇيقى پروبلەماسى (باس قىشىعاندىقتان)؛

باس تەرىسىنىڭ اۋىرسىنۋى نەمەسە قىزارۋى (ۇزاق تاراعاندىقتان.

بالادا ءبيت بار ەكەنىن قالاي تەكسەرەمىز؟

ەگەر بالا باسى قىشيتىنىن ايتىپ، ونى قاسي بەرسە، دارىگەرگە كورىنگەنگە دەيىن ءوزىڭىز ونىڭ باسىن تەكسەرە الاسىز:

جارىق بولمەنى تاڭداپ، بالانى تەرەزەنىڭ نەمەسە شامنىڭ قاسىنا وتىرعىزىڭىز. قوسىمشا قولشام نەمەسە ۇستەل شامىن الساڭىز بولادى؛

تىستەرى جىڭىشكە جانە ءبىر-بىرىنە جاقىن ورنالاسقان تاراقتى الىڭىز. دۇكەندەردە بيتكە ارنالعان ارنايى تاراق تا ساتىلادى.

بالانىڭ باس تەرىسىن تەكسەرىڭىز، اسىرەسە، قۇلاق ارتىن جانە مويىننىڭ ارتقى تۇسىن قاراپ، سىركەلەردى ىزدەڭىز. ولار وتە ۇساق بولادى جانە ادەتتە شاش تۇبىنە جابىسىپ تۇرادى.

ال ءبيت سىركەلەرگە قاراعاندا قوزعالىپ جۇرەتىنىن ەسكەرىڭىز. ولار كوبىنە باس تەرىسىنەن 1-2 س م بيىكتىكتە جۇرەدى.

بيتتەن ەمدەلۋ

وزدىگىنەن ەمدەلۋدىڭ قاجەتى جوق، دارىگەرگە كورىنگەن دۇرىس. ول بيتتەن ارىلۋعا كومەكتەسەتىن پرەپاراتتار جازىپ بەرەدى. ءبىراق ودان بولەك شاشتى ارنايى تاراقپەن تاراپ تۇرۋ كەرەك. ول ءۇشىن شاشتى سۋلاڭىز جانە شاش جاقسى تارالۋ ءۇشىن وعان كونديتسيونەر جاعىڭىز. سودان سوڭ شاشتى تۇبىنەن باستاپ ۇشىنا دەيىن بيتتاراقپەن تاراڭىز. ءار تاراعاننان كەيىن تاراقتى سىركەگە تەكسەرىپ، ونى ىلعال داكەمەن ءسۇرتىپ الىڭىز. ءبيت پەن سىركە ۇيدەگى وتباسىداعى باسقا ادامدارعا جۇقپاس ءۇشىن جاستىق تىستارىن، باس كيىمدەردى، سۇلگىلەردى جانە كيىمدەردى ءجيى جۋىپ، ۇتىكتەڭىز.