قوشانوۆ: پرەزيدەنت ءار جولداۋىندا ەلدى دامىتۋ ءۇشىن جۇيەلى رەفورمالاردى ىسكە قوسادى
مەملەكەت باسشىسىنىڭ جولداۋلارى قالاي جۇزەگە اسىرىلىپ جاتقانى تۋرالى پرەمەر-مينيستر ءاليحان سمايىلوۆ ماجىلىستەگى «AMANAT» فراكسياسىنىڭ كەڭەيتىلگەن وتىرىسىندا باياندادى، دەپ حابارلايدى قازاقپارات.
ءسوز باسىندا ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ فراكسيانىڭ كەڭەيتىلگەن وتىرىسىن اشا وتىرىپ، بىلتىرعى رەفەرەندۋمدا حالىق مەملەكەت باسشىسىنىڭ ساياسي رەفورمالارىن تولىق قولداعانىن جانە جاڭارعان اتا زاڭ اۋقىمدى وزگەرىستەردىڭ باستاۋى بولعانىن اتاپ ءوتتى. سونداي-اق، ول مەملەكەت باسشىسى ءار جولداۋىندا ەلىمىزدە ادىلدىك پەن دەموكراتيا پرينتسيپتەرىن ورنىقتىرۋ جانە نىعايتۋ جولىندا جۇيەلى تۇردە، كەزەڭ-كەزەڭىمەن جاعداي جاساپ كەلە جاتقانىن العا تارتتى.
«مەملەكەت باسشىسىنىڭ باستاماسىمەن بيىل العاش رەت جەڭىسكە جەتكەن پارتيا پرەمەر-ءمينيستردىڭ كانديداتۋراسىن ۇسىندى. بۇگىن جاڭا ساياسي ماۋسىمنىڭ قارساڭىندا ءبىز تاعى ءبىر ءداستۇردى باستاعالى وتىرمىز. العاش رەت فراكسيا وتىرىسىندا پرەزيدەنتتىڭ جولداۋلارى مەن سايلاۋالدى باعدارلامالارىنىڭ ورىندالۋى جونىندە پرەمەر-ءمينيستردىڭ اقپاراتىن تىڭدايتىن بولامىز. سوندىقتان باسىم داۋىسقا يە بولعان پارتيا رەتىندە فراكسيا وتىرىسىنا ۇكىمەت باسشىسىن ارنايى شاقىرىپ وتىرمىز»، - دەدى ەرلان قوشانوۆ.
