ساياسات نۇربەك ەلىمىزدە سۋتەگى ەنەرگەتيكاسىن دامىتۋعا قاتىستى تۇسىنىك بەردى

استانا. قازاقپارات - قازاقستاندا سۋتەگى ەنەرگەتيكاسى باعىتىندا ەكى ۇلكەن عىلىمي ورتالىقتى دامىتۋعا ەكپىن قويىلدى. بۇل تۋرالى ەلوردادا ءوتىپ جاتقان كونفەرەنتسيادا عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.

«سۋتەگى ەنەرگياسىنا ايتارلىقتاي نازار اۋدارىپ وتىرمىز. بۇل باعىتتا قازىر ەكى ۇلكەن عىلىمي ورتالىق قۇرىلىپ جاتىر. ءبىرىنشىسى - ەۋرازيا ۇلتتىق ۋنيۆەرسيتەتىندە. ە ۇ ۋ بازاسىندا وتە جاقسى عىلىمي رەزەرۆ قالىپتاستى. 10-15 جىل شاماسىندا جاقسى عالىمدار توبى جينالدى، سونداي- اق بىرنەشە قولدانبالى ءارى ءىرى جوبالار جۇزەگە اسىرىلدى. سۋتەگى ەنەرگەتيكاسى بويىنشا بۇل عىلىمي ورتالىققا ءبىز جەتكىلىكتى قارجى ءبولىپ جاتىرمىز»، - دەدى س. نۇربەك قازاقستاندا جاڭارتىلاتىن ەنەرگيا كوزدەرىن دامىتۋعا ارنالعان كونفەرەنسيادا.

ونىڭ ايتۋىنشا، سۋتەگى اۆتوموبيل ونەركاسىبىندە وتە تارتىمدى باعىتقا اينالدى. جاپوندىق ۇلكەن كونسەرندەر سۋتەگى وتىنىمەن جۇرەتىن كولىكتەرگە ەرەكشە ءمان بەرىپ وتىر. سونىمەن قاتار، ەۋروپانىڭ ەلدەرى سۋتەگى ستراتەگيالارىن ازىرلەۋگە كىرىستى.

«ماڭعىستاۋ وبلىسىندا «جاسىل» سۋتەگىن ءوندىرۋ بويىنشا ءىرى جوبا ىسكە قوسىلىپ جاتىر. بۇل جوبا بىرتىندەپ دامىپ كەلەدى»، - دەدى ساياسات نۇربەك.

بۇدان بۇرىن حابارلانعانداي، بىلتىر ماڭعىستاۋ وبلىسىندا «جاسىل» سۋتەگىن ءوندىرۋ جانە تاراتۋ ورتالىعىن قۇرۋ جوباسى تانىستىرىلدى.

سونداي- اق، وسى وڭىردە مامان دايارلاۋ ءۇشىن گەرمانيا مەن قازاقستاننىڭ جوعارى وقۋ ورىندارى اراسىندا ىنتىماقتاستىق ورناتۋ قاراستىرىلعان.

ال بيىل ماۋسىم ايىندا ماڭعىستاۋ وبلىسى قاراقيا اۋدانىنداعى «جاسىل» سۋتەگى وندىرەتىن زاۋىتتىڭ قۇرىلىسى اياسىندا گەرمانيانىڭ فەدەرالدى پرەزيدەنتى فرانك- ۆالتەر شتاينمايەر مەن قازاقستان پرەمەر- ءمينيسترى ءاليحان سمايىلوۆتىڭ قاتىسۋىمەن بۇرعىلاۋ جۇمىستارىن ىسكە قوسۋ ءراسىمى ءوتتى.