رەسەيلىكتەر ءبىر بالانى مەكتەپكە دايىنداۋعا قانشا قارجى جۇمسايدى
وزگە دە پوستكەڭەستىك ەلدەر سەكىلدى نەگىزگى شىعىن كيىم ساتىپ الۋعا جۇمسالادى. وعان مەكتەپ جانە سپورت فورماسى، سپورتتىق اياق كيىم مەن اكسەسسۋارلار كىرەدى. سونىمەن بىرگە سومكە مەن وقۋ قۇرالدارىن الۋ كەرەك. رەسەيلىكتەر گيپەرماركەتتەردە، ماركەتپلەيستەردە، بازارلار مەن مامانداندىرىلعان دۇكەندەردە ساۋدا جاساپ جاتىر.
رەسەيدىڭ فەدەرالدىق زاڭناماسىنا سايكەس، وقۋشى كيىمىنە قويىلاتىن تالاپتاردى ءار مەكتەپ جەكە بەلگىلەيدى. ءبىراق تۇتاستاي العاندا، كوپتەگەن مەكتەپ ىسكەرلىك ستيلدەگى كيىمگە باسىمدىق بەرەدى.
وقۋشىلارعا سارافان، جاكەت، پيدجاك، شالبار، كلاسسيكالىق بەلدەمشە، جەيدە، بلۋزكا، كلاسسيكالىق اياق كيىم كيۋ ۇسىنىلادى. سۋىق مەزگىلدە جەمپىر، سۆيتەر كيۋگە بولادى. گالستۋكتى ءار وقۋشى قالاۋىنشا تاعا الادى. سپورتتىق فورماعا فۋتبولكا، تريكو، شولاق شالبار، كەدى مەن كروسسوۆكالار كىرەدى.
ماسەلەن، بالاعا رەسەيلىك زاۋىتتا شىعارىلعان كيىم الۋ ءۇشىن تومەندەگى باعالاردى ەسكەرۋ قاجەت: شالبار 1500 رۋبلدەن، پيدجاك - 3200 رۋبلدەن، جەيدە - 900 رۋبلدەن (كەم دەگەندە ەكەۋ الۋ كەرەك)، كويلەك 1200 رۋبلدەن، جارتىلاي قىستىق اياق كيىم - 4800 رۋبلدەن، جەمپىر 1450 رۋبلدەن باستالادى، اتالعان كيىمدەرگە 13950 رۋبل قاجەت.
قىزدار مەن ۇلدارعا ارنالعان سپورتتىق كيىمدەردىڭ باعاسى بىردەي: سپورتتىق كوستيۋمدەر 1450 رۋبلدەن، فۋتبولكالار - 390 رۋبلدەن، شولاق شالبارلار - 700 رۋبلدەن، كەدى - 600 رۋبلدەن، كروسسوۆكالار 1700 رۋبلدەن باستالادى، اياق كيىمگە ارنالعان سومكە 150 رۋبل تۇرادى. وسىلايشا بارلىعى - 4840 رۋبل.
قاراپايىم مەكتەپ سومكەسى كەم دەگەندە 2000 رۋبل تۇرادى، ال ورتوپەديالىق سومكەلەردى - 5500 رۋبلگە تابۋعا بولادى. وقۋ قۇرالدارىنا تاعى 3500 رۋبل قاجەت.
وقۋلىقتارعا كەلسەك، بەلگىلەنگەن ەرەجەلەرگە سايكەس، مۋنيتسيپالدى جالپى ءبىلىم بەرەتىن ۇيىمداردا وقۋلىقتار مەن وقۋ قۇرالدارىن الۋ شىعىندارىن مەملەكەت كوتەرەدى. الايدا كەيبىر جاعدايلاردا وقۋشىلار قوسىمشا وقۋ قۇرالدارى مەن جۇمىس داپتەرلەرىن الا الادى. ولاردىڭ باعاسى 100 دەن 7 مىڭ رۋبلگە دەيىن سوزىلادى. بۇل ەرىكتى ساتىپ الۋلار بولعاندىقتان ءبىزدىڭ ەسەپكە الىنبايدى.
وسىلايشا، رەسەيدە ءبىر بالانى مەكتەپكە دايىنداۋعا ۇلدارعا 24290 رۋبل، قىزدارعا 28140 رۋبل جۇمسالادى. بۇل قازاقستان ۇلتتىق بانكىنىڭ قازىرگى كۋرسى بويىنشا 118292 جانە 137041 تەڭگە.
