قايتارىلعان اكتيۆتەردى باسقارۋ كومپانياسىنىڭ جۇمىسىن قارجى مينيسترلىگى باقىلايدى

None

استانا. قازاقپارات – ق ر قارجى مينيسترلىگىنە ءبىرقاتار قوسىمشا مىندەتتەر جۇكتەلمەك، دەپ حابارلايدى قازاقپارات ءتىلشىسى.

اشىق ن ق ا پورتالىندا جاريالانعان ۇكىمەت قاۋلىسىنا ساي، ۆەدومستۆوعا مىنا فۋنكسيالار بەرىلەدى:

- «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» ق ر زاڭىنا سايكەس تاركىلەنگەن، رەسپۋبليكالىق مەنشىككە اينالدىرىلعان مۇلىكتى، سونداي-اق مەملەكەت كىرىسىنە اينالدىرىلعان مۇلىكتى (اكتيۆتەردى) ەسەپكە الۋ جانە ودان ءارى پايدالانۋ بويىنشا دەرەكتەر بازاسىن جۇرگىزۋ؛

- «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» ق ر زاڭىنا سايكەس باسقارۋشى كومپانيانىڭ مۇلىكتى (اكتيۆتەردى) باسقارۋ تيىمدىلىگىن باقىلاۋ؛

- باسقارۋشى كومپانياعا بەرىلگەن اكتيۆتەردى باسقارۋ ءتارتىبىن ايقىنداۋ؛

- ق ر ۇلتتىق بانكىمەن جانە ۆاليۋتالىق باقىلاۋ اگەنتتەرىمەن بىرلەسىپ، رەزيدەنتتەردىڭ رەپاترياتسيالاۋ تالابىن ورىنداۋىن باقىلاۋ ماقساتىندا ەكسپورت نەمەسە يمپورت جونىندەگى جەكەلەگەن ۆاليۋتالىق شارتتار شەڭبەرىندە اقشا قوزعالىسىن جانە مىندەتتەمەلەردىڭ وزگە دە ورىندالۋىن مونيتورينگتەۋ؛

- ۋاكىلەتتى ورگانمەن بىرلەسىپ اكتيۆتەردى قايتارۋ بويىنشا اكتيۆتەردى اشىپ كورسەتۋ تۋرالى دەكلاراتسيانىڭ نىسانى مەن ونى ۇسىنۋ ءتارتىبىن بەكىتەدى؛

- ءوز قۇزىرەتى شەگىندە «ۆاليۋتالىق رەتتەۋ جانە ۆاليۋتالىق باقىلاۋ تۋرالى» ق ر زاڭىنا سايكەس ۆاليۋتالىق باقىلاۋ جۇرگىزۋ؛

- ارناۋلى مەملەكەتتىك قوردىڭ قاراجاتىن پايدالانۋ جانە ونىڭ مونيترينگتەۋ ءتارتىبىن ايقىنداۋ؛

- ارناۋلى مەملەكەتتىك قور قاراجاتىنىڭ تۇسىمدەرى مەن جۇمسالۋى تۋرالى اقپاراتتى جىل سايىن جاريالاۋ.

ۇكىمەت قاۋلىسىنىڭ جوباسى 13- قىركۇيەككە دەيىن كوپشىلىك تالقىلاۋدا بولادى.

قوسا كەتسەك، تاياۋدا قايتارىلعان اكتيۆتەردى باسقارۋ كومپانياسىنا قانداي مامانداردىڭ تارتىلاتىنىن جازىپ ەدىك.

سوڭعى جاڭالىقتار