قۇزىرلى ورگاندار ءۇندىستاندا زورلىق- زومبىلىقتان زارداپ شەگىپ جاتقان قاراعاندىلىق ايەلدىڭ ماسەلەسىن باقىلاۋعا الدى

استانا. قازاقپارات - كالكۋتتادا تۇرىپ جاتقان قاراعاندىلىق ايەلگە قۇجات ماسەلەسى بويىنشا كومەك كورسەتىلىپ جاتىر. جاعداي قازاقستاننىڭ ءۇندىستانداعى ەلشىلىگىنىڭ ەرەكشە باقىلاۋىندا، دەپ حابارلايدى قازاقپارات.

28-تامىزدا قازاقستاننىڭ ءۇندىستانداعى ەلشىلىگىنە قازاقستان ازاماتشاسى حابارلاسىپ، وعان جانە ونىڭ 3 بالاسىنا ەلىمىزگە ورالۋعا كومەك كورسەتۋ تۋرالى ءوتىنىش بىلدىرگەن. ول ءۇندىستان ازاماتى بولىپ تابىلاتىن كۇيەۋىمەن بىرگە كالكۋتتا قالاسىندا تۇرادى.

ونىڭ ايتۋىنشا، كۇيەۋى وعان مورالدىق قىسىم جاسايدى، قارجىلاي شەكتەيدى جانە كۇش قولدانۋ ارەكەتىمەن قورقىتادى. جەكە وتباسىلىق جانجال سالدارىنان ايەل قازاقستانعا ورالۋعا نيەت ءبىلدىردى.

«قولداعى اقپاراتقا سايكەس، وتانداسىمىزدىڭ ۇلكەن قىزى – ق ر ازاماتى، ال قالعان ەكەۋى - ءۇندىستان ازاماتتارى. ۇلكەن قىزىنىڭ ءۇندىستان ۆيزاسىنىڭ مەرزىمى ءوتىپ كەتكەن، بۇل كوشى- قون زاڭناماسىن بۇزۋ بولىپ سانالادى. ال كىشى ەكى بالانى اكەتۋ ءۇشىن ەكىنشى اتا- انانىڭ زاڭدى رۇقساتى قاجەت.

قالىپتاسقان كۇردەلى جاعدايدى ەسكەرە وتىرىپ، قازاقستاندىق ديپلوماتتار وتانداسىمىزعا قاجەتتى كونسۋلدىق- قۇقىقتىق كومەك كورسەتۋدە»، - دەلىنگەن حابارلامادا.

سونىمەن قاتار قازاقستاننىڭ كالكۋتتاداعى قۇرمەتتى كونسۋلى قۇجاتتار ماسەلەسىن شەشۋ ءۇشىن كومەك كورسەتىپ جاتىر. ماسەلە قازاقستاننىڭ ءۇندىستانداعى ەلشىلىگىنىڭ ەرەكشە باقىلاۋىندا.

بۇعان دەيىنزورلىق- زومبىلىقتان زارداپ شەگىپ جاتقان، كالكۋتتادا تۇراتىن قاراعاندىلىق ايەلدىڭ ەلگە قايتۋعا ءوتىنىش ءبىلدىرىپ، كومەك سۇراعانى جايلى جازعان ەدىك. ونى قازاقستانعا قايتارۋعا مينيسترلىك تە كومەكتەسەتىن بولدى.