قازاقستاندا حروم، اليۋميني، مىرىش قورى ازايىپ كەلەدى
ونىڭ ايتۋىنشا، قازىر بارلىق كەن ورنى تەكسەرىلىپ جاتىر. ءوز مىندەتتەمەسىن ورىندامايتىن جەر قويناۋىن پايدالانۋشى كومپانيالاردان ليتسەنزيا الىنىپ، كەلىسىمشارت بۇزىلىپ جاتىر.
«مەتالداردىڭ جەكەلەگەن ءتۇرى بويىنشا الەمدە جەتەكشى ورىنعا يە بولعانمەن، شيكىزات بازاسىنىڭ ايتارلىقتاي تومەندەگەنىن بايقاپ وتىرمىز. مىسالى، حروم، اليۋمينيي، مىرىش، مىس، قورعاسىن قورى ازايىپ كەلەدى. جوعارى تەحنولوگيالىق ونىمدەر ءوندىرىسىنىڭ نەگىزى بولاتىن سيرەك جەر مەتالدارىن بارلاۋ باسەڭدەگەن. ءبىز ءالى كۇنگە دەيىن ءبىرىنشى ءوتىنىم پرينتسيپى بويىنشا ليتسەنزيا العان جاڭا كومپانيالاردىڭ ناقتى جۇمىسىن كورمەدىك»، - دەدى ءا. سمايىلوۆ بۇگىنگى ۇكىمەت وتىرىسىندا.
وعان قوسا، جەر قويناۋىن زەرتتەۋدىڭ عىلىمي بازاسى مەن ينفراقۇرىلىمى بارىنشا جاڭارتۋدى تالاپ ەتەدى.
ينۆەستورلاردى ودان ءارى تارتۋعا قاجەتتى گەولوگيالىق اقپاراتتى سيفرلاندىرۋ جۇمىستارى دا اياقتالعان جوق. بىلىكتى گەولوگتار مەن گەودەزيست ماماندار تاپشى.
«12 جىلدا گەولوگيالىق بارلاۋ جۇمىستارىن جۇرگىزۋگە 2 تريلليون تەڭگەدەن استام جەكە ينۆەستيتسيا سالىندى. ءبىراق سوعان قاراماستان، ءبىز جاڭا كەن ورىندارىن بارلاۋعا جۇمسالاتىن سالىمدار بويىنشا ارتتا قالىپ وتىرمىز. اتالعان پروبلەمالاردى شەشۋ ءۇشىن قولدانىستاعى زاڭناماعا ءتيىستى وزگەرىستەر قابىلداندى»، - دەيدى ۇكىمەت باسشىسى.
پرەمەر-مينيستر يندۋستريا مينيسترلىگىنە رەسۋرستىق بازانى ۇلعايتۋ، سيرەك كەزدەسەتىن جانە سيرەك جەر مەتالدار نەگىزىندە جوعارى تەحنولوگيالىق ونىمدەر ءوندىرىسىن ۇيىمداستىرۋ ءۇشىن جول كارتاسىن ازىرلەۋدى تاپسىردى.
ەنەرگەتيكا مينيسترلىگىنە «سامۇرىق-قازىنا» قورىمەن بىرگە 2 ايدا زاماناۋي تەحنولوگيالىق شەشىمدەردى پايدالانىپ، گازدى كەن ورىندارىنىڭ تاريحي دەرەكتەرىنە تالداۋ جۇرگىزۋ جۇكتەلدى.
«يندۋستريا، عىلىم جانە ەنەرگەتيكا مينيسترلىكتەرى جىل سوڭىنا دەيىن عىلىمي بازا مەن ينفراقۇرىلىمعا تالداۋ جۇرگىزۋى كەرەك. ناتيجەسى بويىنشا ولاردى دامىتۋ جونىندەگى ءتيىستى ءىس-شارالار جوسپارىن ازىرلەۋى قاجەت. سيفرلىق دامۋ، يندۋستريا جانە ەنەرگەتيكا مينيسترلىكتەرى جىل سوڭىنا دەيىن تاريحي دەرەكتەردىڭ بارلىق تۇرىنە كەشەندى تالداۋ جۇرگىزىپ، ونلاين- پلاتفورمانى بارىنشا تولتىرۋى كەرەك. يندۋستريا جانە ەنەرگەتيكا مينيسترلىگى جوسىقسىز جەر قويناۋىن پايدالانۋشىلارعا شارالار قابىلداپ، جىل سوڭىنا دەيىن بارلىق كەن ورنىن تەكسەرۋدى اياقتاسىن»، - دەدى ءاليحان سمايىلوۆ.
