استانادا حالىق سانىن شەكتەۋ دۇرىس دەپ ويلايمىن - تامارا دۇيسەنوۆا
كەشە الەۋمەتتىك جەلىدە ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسقاربەك ەرتايەۆتىڭ مالىمدەمەسى تاراعان ەدى.
ول استاناعا كوشىپ كەلۋشىلەر سانىنا شەكتەۋ قويىلاتىنىن، كوشى-قون اعىنى باقىلاۋعا الىناتىنىن ايتقان.
ءتيىستى زاڭ جوباسىن ەلوردا اكىمدىگى دايىنداپ جاتىر.
«قازىرگى تاڭدا بۇل ماسەلە دۇرىس شىعار دەپ ەسەپتەيمىن، سەبەبى ەلوردادا مەكتەپ، مەديتسينا، جالپى الەۋمەتتىك ينفراقۇرىلىم دايىن ەمەس. ەگەر الەۋمەتتىك ينفراقۇرىلىم، دايىن بولسا، قاجەتتى مۇمكىندىكتەر بولسا، ارينە كوبەيتۋگە بولادى. سوندىقتان، قازىرگى ۋاقىتتا استانا قالاسىنداعى جالپى ينفراقۇرىلىمدى ەسەپكە الا وتىرىپ، مۇنى دۇرىس شەشىم دەپ ەسەپتەيمىن. مىسالى ءبىر ۇيدە 5-6 وتباسى تۇرىپ جاتىر، الەۋمەتتىك جاعداي ناشار. قالا سونشا ازاماتتى مەكتەپكە قابىلداي الا ما، ەمحاناعا قابىلداي الا ما، سول جاعىن ويلاۋ كەرەك»، - دەدى تامارا دۇيسەنوۆا ۇكىمەت كۋلۋارىندا.
ونىڭ ايتۋىنشا، قازىر استانا قالاسىندا 1 ميلليوننان اسا ادام تۇرىپ جاتىر. بۇرىنعى اقمولا قالاسى 300 مىڭ ادامعا عانا ەسەپتەلگەن ەدى.
«ەگەر استانانىڭ كولەمى كەڭەيىپ، مۇمكىندىكتەر جاسالسا، اسىرەسە، الەۋمەتتىك ينفراقۇرىلىم سالىنسا، وندا اشۋعا بولادى. قازىر ۋاقىتشا وسىنداي شەشىم قابىلداۋعا تۋرا كەلەدى. وقۋعا كەلگەندەر، جۇمىس ىستەۋگە كەلگەندەر بار. مىسالى، جۇمىس بەرۋشىلەر ولاردى جۇمىسقا شاقىرىپ، ۇيمەن نەمەسە جاتاقحانامەن قامتاماسىز ەتسە، ەش شەكتەۋ بولمايدى. حالىقارالىق تاجىريبەدە دە مۇنداي ماسەلەلەر بار. مۇندا ا ق ش استاناسى ۆاشينگتون قالاسىنىڭ ستاندارتتارىن ايتۋعا بولادى. فرانسيانىڭ ءار قالاسىنا بەرىلگەن ستاندارت بار. ءبىر نارسەنى تۇسىنەيىك، ەشكىم ەشتەڭەگە كەدەرگى كەلتىرىپ جاتقان جوق. ءار قالانىڭ ءوز ينفراقۇرىلىمى بار. شىمكەنت، الماتى قالالارىندا دا تۋرا سونداي جاعداي بولدى. ماسەلە - ازاماتتاردىڭ الەۋمەتتىك جاعىنان دۇرىس مۇمكىندىك الۋى»، - دەپ ءتۇسىندىردى مينيستر.
