مىرزاعالي ايتجانوۆ: باستى ماقساتىمىز - وليمپياداعا تولىق قۇراممەن بارۋ

استانا. قازاقپارات - الداعى قىركۇيەك ايىنىڭ سوڭعى اپتاسىندا قىتايدىڭ حاڭجوۋ قالاسىندا كەزەكتى ازيا ويىندارىنىڭ الاۋى تۇتانادى.

سارىقۇرلىق دوداسىندا العاش رەت بوكستان پاريج وليمپياداسىنا جولدامالار ساراپقا سالىنادى.

ءباسى بيىك دودا باستالماس بۇرىن بوكستان ۇلتتىق قۇرامانىڭ باس باپكەرى مىرزاعالي ايتجانوۆپەن شاكىرتتەرىنىڭ دايىندىعى مەن جوسپارى تۋرالى ءاز- كەم اڭگىمە قۇردىق.

- مىرزاعالي قۇلان ۇلى، ازيا ويىندارىنا اپاراتىن شاكىرتتەرىڭىزدىڭ ەسىمدەرى بەلگىلى بولدى. سوڭعى دايىندىقتارىڭىز قايدا، قالاي ءوتىپ جاتىر؟

- سارىقۇرلىق دوداسىنا وتە جوعارى دەڭگەيدە دايىندالىپ جاتىرمىز. قازىر الماتى وبلىسىنداعى «اقبۇلاق» وليمپيادالىق ورتالىعىندا سپورتشىلار تاۋعا شىعىپ، دەنە دايىندىعىمەن جاتتىعۋدى جالعاستىرىپ جاتىرمىز. سوڭعى قورىتىندى جاتتىعۋ تۇركىستان قالاسىندا وتەدى. بۇيىرسا، 20-قىركۇيەك كۇنى الماتىدان حاڭجوۋ قالاسىنا اتتانامىز دەپ جوسپارلاپ وتىرمىز.

- حاڭجوۋدا بوكسشىلار اراسىندا العاش رەت پاريج وليمپياداسىنا جولدامالار ساراپقا سالىنباق. جالپى، قانشا ليتسەنزيا ساراپقا سالىنادى؟

- وزدەرىڭىز بىلەسىزدەر، سوڭعى كەزدەرى بوكستا كوپتەگەن وزگەرىستەر بولدى. بۇرىن بوكسشىلار وليمپيادا ويىندارىندا ون سالماقتا سىنعا تۇسسە، قازىر ونىڭ ۇشەۋى قىسقارىپ، جەتى سالماق قانا قالدى. اتاپ ايتساق، پاريج تورىندە ەرلەر 51، 57، 63,5، 71، 80، 92 جانە +92 سالماق دارەجەسىندە سىنعا تۇسەدى. سارىقۇرلىق دوداسىندا دا وسى جەتى سالماقتان فينالعا شىققان قوس بوكسشى وليمپيادا جولداماسىن قانجىعالارىنا بايلايدى.

- بۇيىرسا، سول جەتى سالماقتان بەرىلەتىن 14 جولدامانىڭ قانشاسىن ەلگە اكەلۋدى جوسپارلاپ وتىرسىزدار؟

- ونىڭ بارلىعىن رينگ كورسەتەدى. دەسە دە، ءۇش جولدامادان دامەلىمىز.

- ءوزىڭىز قاي سالماقتارعا باسىمدىق بەرىپ وتىرسىز؟

- ناقتى، قاي سالماق ەكەنىن ءدال قازىر كەسىپ ايتۋعا ءالى ەرتە، ءبارىن ۋاقىت كورسەتە جاتار.

- بۇل جولى باعى جانباعان بوكسشىلار تاعى قانداي جارىستاردا وليمپيادا جولداماسىنا تالاسۋعا مۇمكىندىكتەرى بار؟

- ليتسەنزيا تاراتاتىن جارىستار ازيا ويىندارىمەن عانا اياقتالمايدى. بۇل باسى عانا. كەلەسى، ياعني، 2024 -جىلى پاريجدىڭ جولدامالارى ساراپقا سالىناتىن ەكى ءىرى حالىقارالىق تۋرنير بولادى. سونىڭ ءبىرى يتاليادا، ەكىنشىسى بانگكوكتا وتەدى. بىرىنشىسىندە – 49، ال ەكىنشىسىندە 51 ليتسەنزيا ويناتىلادى دەپ جوسپارلانىپ وتىر. دەمەك، حاڭجوۋدا جولى بولماعان بوكسشىلارعا الدا ءالى دە كوپتەگەن مۇمكىندىكتەر بار. مەنىڭ باستى ماقساتىم - بوكسشىلاردى پاريج وليمپياداسىنا جەتى سالماقتا تولىق قۇراممەن اپارۋ.

- اڭگىمەڭىزگە راحمەت!

اۆتور:

كۇنسۇلتان وتارباي