تۇندە ۇزاق جۇمىس ىستەۋ نەسىمەن قاۋىپتى؟
الايدا تۇندە ۇزاق جۇمىس ىستەۋ فيزيكالىق جانە پسيحيكالىق دەنساۋلىققا، سونداي-اق جالپى ءومىر ساپاسىنا جاعىمسىز اسەر ەتۋى مۇمكىن. تۇندە ۇزاق جۇمىس ىستەۋ نەمەسە تۇنگى اۋىسىمداعى جۇمىس سىزگە قانداي قاۋىپ ءتوندىرۋى مۇمكىن؟
ۇيقى بۇزىلادى
ءبىزدىڭ اعزامىز بيولوگيالىق ىرعاقتارعا سايكەس قىزمەت ەتەدى. ونى تسيركادتى ىرعاقتار دەپ تە اتايدى. تۇندە جۇمىس ىستەۋ ۇيقىنىڭ جانە وياۋ ءجۇرۋدىڭ تابيعي ىرعاقتارىن بۇزىپ، ۇيقىسىزدىققا جانە كۇندىزگى ۇيقىشىلدىققا قاتىستى پروبلەمالارعا اكەلەدى.
جۇرەك پەن قان تامىرلارعا جاعىمسىز اسەر ەتەدى
ۇزاق تۇنگى جۇمىس جۇرەك- قان تامىرلار اۋرۋلارى قاۋپىن ارتتىرادى. بۇل ۇيقى رەجيىمىنىڭ بۇزىلۋىمەن بايلانىستى.
ءتۇرلى اۋرۋلار قاۋپىن ارتتىرادى
ۇزاق تۇنگى جۇمىس گورموندار تەپە-تەڭسىزدىگىنە اكەلەدى. ال ول ءتۇرلى اۋرۋلار قاۋپىن ارتتىرادى. مىسالى: قانت ديابەتى، سەمىزدىك، قاتەرلى ىسىك جانە ت. ب.
اسقورىتۋ ناشارلايدى
تسيركادتى ىرعاقتار اسقورىتۋ جۇيەسىنە اسەر ەتەدى. ادام اعزانىڭ بيولوگيالىق ىرعاقتارىنا سايكەس تاماقتانباعاندىقتان، اسقورىتۋ بۇزىلۋى مۇمكىن. بۇل ارتىق سالماققا اكەلۋى مۇمكىن.
كۇيزەلىسكە تۇسىرەدى
تۇنگى جۇمىسپەن بايلانىستى كۇيزەلىس جانە ۇيقىنىڭ بۇزىلۋى دەپرەسسيا، مازاسىزدىق جانە اشۋلانشاقتىق سەكىلدى پسيحولوگيالىق پروبلەمالارعا اكەلۋى مۇمكىن.
ومىرىڭىزگە جانە قارىم-قاتىناسىڭىزعا جاعىمسىز اسەر ەتەدى
تۇنگى جۇمىس وتباسىڭىزبەن نەمەسە دوستارىڭىزبەن ارالاسۋعا كەدەرگى كەلتىرۋى مۇمكىن. سەبەبى ءسىزدىڭ جۇمىس كەستەڭىز باسقالاردىڭ ۋاقىتىمەن سايكەس كەلمەيدى.
تۇندە جۇمىس ىستەيتىن ادامدارعا بىرنەشە پايدالى كەڭەس:
كەستەنى دۇرىس جوسپارلاۋ. جۇمىس كەستەڭىزدى ۇيىمداستىرۋ كەزىندە تۇنگى اۋىسىم ۇزاقتىعىن بارىنشا قىسقارتاتىنداي جانە دەمالۋعا ۋاقىت بولاتىنداي ەتىپ جاساۋعا تىرىسىڭىز؛
ۇيقى رەجيمىن ساقتاۋ. كۇنىنە 7-8 ساعاتتان از ۇيىقتاماۋعا تىرىسىڭىز. سونداي-اق ۇيىقتاۋعا قولايلى شارتتاردى جاساڭىز. مىسالى: بولمەنى قاراڭعىلاتۋ، قولايلى تەمپەراتۋرا جاساۋ؛
دۇرىس تاماقتانۋ. راتسيونىڭىزعا ءمان بەرىڭىز. پايدالى تاماقتار جەپ، زيان تىسكەباسارلاردان باس تارتىڭىز؛
فيزيكالىق بەلسەندىلىك. كۇن تارتىبىڭىزگە فيزيكالىق جاتتىعۋلار قوسىڭىز. بۇل جالپى دەنساۋلىعىڭىزدى جاقسارتۋعا كومەكتەسەدى.
