اسا قاتتى سوكپەڭىزدەرشى: مادەنيەت ءۇيىنىڭ ديرەكتورى كەشىرىم سۇرادى

اقتوبە. قازاقپارات - ىبىقتى سايىندا بورلى تاۋعا قاشاپ جازۋ جازىپ، كوپشىلىك سىنىنا ۇشىراعان مادەنيەت ءۇيىنىڭ ديرەكتورى ماناس كوشەربايەۆ قازاق ەلىنەن كەشىرىم سۇرادى، دەپ حابارلايدى قازاقپارات ءتىلشىسى.

وقيعا ماڭعىستاۋ وبلىسىنىڭ ىبىقتى سايىندا بولدى. كوپشىلىك بورلى تاۋعا قاشاپ جازىپ، ەسكەرتۋگە قۇلاق اسپاعان ادامدى ىزدەپ، جازالانۋىن تالاپ ەتتى.

ماناس كوشەربايەۆ جاعدايدىڭ ءمان-جايىن ءتۇسىندىرىپ، حالىقتان كەشىرىپ سۇرادى.

«مەن كوشەربايەۆ ماناس مارات ۇلى 24-تامىزدا ماڭعىستاۋ وبلىسى اقتاۋ قالاسى ىبىقتى سايدا بولعان جاعدايعا بايلانىستى تۇسىنىكتەمە بەرگىم كەلەدى. ىبىقتى ساي - ماڭعىستاۋدىڭ كوركەم جەرلەرىنىڭ ءبىرى. وكىنىشتىسى، قاراۋسىز قالعان. جولى وتە ناشار، جان-جاعى قوقىسقا تولى. سول ادەمى، كەرەمەت ۇڭگىردىڭ ءىشى تولعان جازۋ، ادەپسىز سوزدەر. سونداي ءبىر دورەكى ءسوزدى ادەمى ەسىمگە اينالدىرماق نيەتىم عانا بولدى. اڭداۋسىز جازا باستىم! جاڭىلمايتىن جاق، سۇرىنبەيتىن تۇياق بولمايدى. اسا قاتتى سوكپەڭىزدەرشى!! تاريحي جەرگە قىلداي قيانات قىلۋ ويىمدا دا بولمادى. بارشا وتانداستارىمنان، ماڭعىستاۋ جۇرتىنان باسىمدى ءيىپ كەشىرىم سۇرايمىن! عافۋ ەتىڭىزدەر»، - دەپ جازىپ، كەيىن بەينەكەشىرىمىن جاريالادى.

ايتا كەتەيىك، ماناس كوشەربايەۆ اقتوبە قالالىق زاعيپتار قوعامى مادەنيەت ءۇيىنىڭ ديرەكتورى.

«قازىرگى تاڭدا ەڭبەك دەمالىسىندا. جۇمىسقا شىققان سوڭ ءتۇسىندىرۋ جۇمىستارى جۇرگىزىلىپ، ءتيىستى شارالار قولدانىلادى»، - دەپ جازدى اقتوبە قالالىق مادەنيەت جانە تىلدەردى دامىتۋ ءبولىمى.