شەكارالىق وتكىزۋ پۋنكتەرىندە قازىر احۋال قانداي – ۇ ق ك مالىمدەمەسى

استانا. قازاقپارات - بيىل تامىزدا شەكارا قىزمەتى شەكاراداعى، ونىڭ ىشىندە وتكىزۋ پۋنكتەرىندەگى زاڭسىز قىزمەتكە قارسى ءىس-شارالار وتكىزدى.

كولىكتەر تەحنيكالىق قاراۋ قۇرالدارىمەن جانە قىزمەتتىك يتتەرمەن تەكسەرىلدى، دەپ حابارلايدى قازاقپارات ق ر ۇ ق ك باسپا ءسوز قىزمەتىنە سىلتەمە جاساپ.

وتكىزىلگەن ءىس-شارالار بارىسىندا ەسىرتكى قۇرالدارىن تاسىمالداۋدىڭ - 35، قارۋ-جاراق پەن وق-ءدارى وتكىزۋدىڭ – 33، جالعان قۇجات جاساۋدىڭ – 20، قوس ازاماتتىقتىڭ - 36 فاكتىسى تىركەلدى. جالپى سوماسى 2 ميلليارد تەڭگە بولاتىن 299 كونتراباندانىڭ جولى كەسىلىپ، 27 رەت جالعان قۇجاتپەن اۆتوكولىكتى كىرگىزىپ-شىعارماق بولعاندار انىقتالدى. كوشى-قون زاڭناماسىن بۇزعان 909 ادام اكىمشىلىك جاۋاپقا تارتىلدى. 28- تامىزداعى جاعداي بويىنشا، بارلىق وتكىزۋ پۋنكتەرى قالىپتى رەجيمدە جۇمىس ىستەپ تۇر.

قازاق-قىرعىز شەكاراسىنداعى «قاراسۋ» (قازاقستان) - «اق تىلەك» (قىرعىزستان) وتكىزۋ پۋنكتى ارقىلى كەشەگى تاۋلىكتە قازاقستان اۋماعىنا 350 دەن استام اۆتوكولىك كىردى. 80-100 اۆتوكولىك كەزەكتە تۇر. بۇل - وسى ماۋسىمداعى قالىپتى جاعداي. قازاق-قىرعىز شەكاراسىنىڭ باسقا اۆتوكولىك وتكىزۋ پۋنكتەرىندە كەزەك جوق. سونىمەن قاتار، وزبەكستانمەن شەكاراداعى «جىبەك جولى»، «جەتىساي»، «ب. قونىسبايەۆ اتىنداعى» جانە «قازىعۇرت» وتكىزۋ پۋنكتەرىندە قايتا قۇرىلىمداۋعا بايلانىستى كولىكتەر كەزەككە تۇرىپ، جينالىپ قالعان. رەسەيمەن شەكاراعا كەلەر بولساق، «سىرىم»، «جايسان» جانە «قايراق» پۋنكتەرىنىڭ الدىندا ۇنەمى كولىكتەر جينالىپ قالادى. بۇل دا - وسى ماۋسىم ءۇشىن قالىپتى جاعداي. سونداي-اق، شەكاراداعى وتكىزۋ پۋنكتەرىندە قانداي دا ءبىر قوسىمشا شەكتەۋ شارالارى ەنگىزىلگەن جوق.