پرەزيدەنت ۇ ق ك ءتوراعاسى ەرمەك ساعىمبايەۆقا ءبىرقاتار تاپسىرما بەردى

استانا. قازاقپارات - مەملەكەت باسشىسى ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆتى قابىلدادى.

بۇل تۋرالى قازاقپارات اقورداعا سىلتەمە جاساپ حابارلايدى.

مەملەكەت باسشىسىنا ۆەدومستۆونىڭ بيىلعى ءۇشىنشى توقساننىڭ باسىنان بەرى اتقارىلعان جۇمىستاردىڭ نەگىزگى ناتيجەسى مەن بۇعان دەيىن بەرىلگەن تاپسىرمالارىنىڭ ورىندالۋ بارىسى جانە الداعى كەزەڭگە ارنالعان جوسپارى تۋرالى مالىمەت بەرىلدى.

قاسىم-جومارت توقايەۆقا قازاقستان اۋماعىندا لاڭكەستىك ارەكەت جاساۋدى جوسپارلاعان راديكالدى توپتىڭ قۇرىقتالعانى تۋرالى باياندالدى. تەرروريستىك قىلمىستار بويىنشا 7 سوتقا دەيىنگى تەرگەۋ امالدارى باستالدى جانە 3 ەكسترەميست سوتتالدى.

ەرمەك ساعىمبايەۆتىڭ ايتۋىنشا، تەرروريزمگە قارسى ءىس-قيمىل شارالارىن جەتىلدىرۋ ماقساتىندا ۇ ق ك تەرروريزمگە قارسى ورتالىعى 103 وقۋ-جاتتىعۋ جيىنىن ۇيىمداستىردى.

سونىمەن قاتار، مەملەكەت باسشىسىنا كريمينوگەندىك احۋالدى جاقسارتۋ جۇمىستارىنىڭ ناتيجەلەرى تۋرالى باياندالدى. اتاپ ايتقاندا، قوعامعا قاۋىپ توندىرگەن 5 قىلمىستىق توپ ارەكەتىنىڭ جولى كەسىلدى. زاڭسىز قارۋ اينالىمىنا قاتىسى بار 2 ارنا جويىلدى. ۇلتتىق قاۋىپسىزدىك ورگاندارى پوليتسيامەن بىرلەسىپ، قارۋ جاسىرىلعان 12 ورىندى انىقتادى. جالپى سانى 59 قارۋ، 3 گراناتا جانە 3 339 وق-ءدارى تاركىلەندى.

ەسىرتكىگە قارسى كۇرەس بارىسىندا 7 زەرتحانا، 8 حالىقارالىق جانە ايماقتىق ەسىرتكى تاسىمالىنىڭ جولى كەسىلدى. 660 كەلىدەن استام ەسىرتكى جانە 17 توننادان اسا پرەكۋرسور تاركىلەندى.

بۇدان بولەك، مەملەكەتتىك شەكارانى قورعاۋ جانە زاڭسىز كوشى-قونمەن كۇرەس سالاسىندا 4257 قۇقىق بۇزۋشى ۇستالدى. قۇنى 3,8 ميلليارد تەڭگەدەن اساتىن ۆاليۋتا مەن تاۋارلاردىڭ زاڭسىز تاسىمالدانۋىنا جول بەرىلمەدى. سونداي-اق قارۋ، وق-ءدارى جانە ەسىرتكى الىپ وتۋگە قاتىستى 120 ارەكەتكە توسقاۋىل قويىلدى.

اقپاراتتىق قاۋىپسىزدىكتى قامتاماسىز ەتۋ بارىسىندا ەلىمىزدىڭ اسا ماڭىزدى ينفراقۇرىلىم نىساندارىنا جاسالعان 36 ميلليوننان استام كيبەرشابۋىل مەن 866 DDoS- شابۋىل تويتارىلدى.

كەزدەسۋ سوڭىندا قاسىم-جومارت توقايەۆ ۇلتتىق قاۋىپسىزدىك ورگاندارىنىڭ جۇمىس باعىتتارى بويىنشا ءبىرقاتار ناقتى تاپسىرما بەردى.