جازدىڭ سوڭعى كۇندەرى اۋا رايى قانداي بولادى

استانا. قازاقپارات - قازگيدرومەت سينوپتيكتەرى 29- تامىز-1- قىركۇيەك ارالىعىنا ارنالعان ءۇش كۇندىك اۋا رايى بولجامىن ۇسىندى، دەپ حابارلايدى قازاقپارات.

الداعى ءۇش تاۋلىكتە رەسپۋبليكانىڭ باسىم بولىگىندە اۋا رايىنىڭ تۇراقسىز سيپاتى ساقتالادى.

نايزاعاي جارقىلداپ، قاتتى جەل تۇرادى، جاڭبىر، سونداي-اق بۇرشاق تا جاۋۋى مۇمكىن.

قازاقستاننىڭ سولتۇستىك-باتىسىندا، سولتۇستىگىندە، ورتالىعىندا، وڭتۇستىگىندە جانە وڭتۇستىك-شىعىسىندا قاتتى جاڭبىر جاۋىپ، اۋا تەمپەراتۋراسى بىرتىندەپ تومەندەي بەرەدى.

اۋا تەمپەراتۋراسىنىڭ ەڭ قاتتى تومەندەۋى رەسپۋبليكانىڭ سولتۇستىك-باتىسىندا، سولتۇستىگىندە بايقالادى.

تۇنگى ۋاقىتتا اۋا تەمپەراتۋراسى 3-11 گرادۋسقا دەيىن، كۇندىز 10-18 گرادۋسقا دەيىن تومەندەيدى.

تەك ەلىمىزدىڭ شىعىسىندا، وڭتۇستىگىندە جانە وڭتۇستىك-شىعىسىندا كەزەڭنىڭ باسىندا جىلى بولادى.

سودان كەيىن 1- قىركۇيەككە قاراي تەمپەراتۋرا تۇندە 10-15 گرادۋسقا دەيىن، كۇندىز 20-25 - گرادۋسقا دەيىن تومەندەيدى.