وقۋشى بالاڭىزدىڭ ارقاسى قيسايىپ كەتپەۋ ءۇشىن نە ىستەۋ كەرەك؟ پەدياتر كەڭەسى

None
استانا. قازاقپارات - قازاقستاندىق وقۋشىلار اراسىندا كەڭ تارالعان اۋرۋلاردىڭ ءبىرى - سكوليوز. بالانىڭ ومىرتقاسىنىڭ قيسايۋىنا وتە اۋىر ريۋكزاك اسەر ەتەدى دەگەن كەڭ تاراعان پىكىر بار.

بۇل قانشالىقتى راس؟ بالانىڭ ارقاسى قيسايىپ كەتپەۋ ءۇشىن نە ىستەۋ كەرەك؟ بۇل سۇراقتارعا Tengri Life-كە پەدياتر باقىتگۇل مۋرزابەكوۆا جاۋاپ بەردى.

سكوليوز - بۇل ومىرتقانىڭ بۇزىلۋى، ەگەر ۋاقىتىلى ساقتىق شارالارى قولدانىلماسا، ول ءسىزدىڭ بالاڭىزدىڭ دەنساۋلىعىنا جاعىمسىز اسەر ەتۋى مۇمكىن. پەدياتر باقىتگۇل مۋرزابەكوۆا بالاڭىزدا سكوليوزدىڭ دامۋىن بولدىرماۋعا كومەكتەسەتىن كەڭەستەرمەن ءبولىستى.

جۇيەلى تۇردەگى فيزيكالىق بەلسەندىلىك

فيزيكالىق بەلسەندىلىك ارقانى ساۋ ۇستاۋدا شەشۋشى ءرول اتقارادى. بالاڭىزدى سپورتپەن، جۇزۋمەن، يوگامەن نەمەسە باسقا فيزيكالىق جاتتىعۋلارمەن اينالىسۋعا شاقىرىڭىز. بۇل ارقا بۇلشىقەتتەرىن نىعايتۋعا جانە ارقانى دۇرىس قالىپتا ۇستاۋعا كومەكتەسەدى.

ەرگونوميكالىق مەكتەپ سومكەسى

ديزاينى دۇرىس جانە ارقاعا سايكەس كەلەتىن ريۋكزاك ومىرتقاعا تۇسەتىن جۇكتەمەنى ازايتادى. سالماق بىركەلكى ءتۇسۋى ءۇشىن ريۋكزاكتا قاتتى جانە رەتتەلەتىن بەلدىكتەر بار ەكەنىنە كوز جەتكىزىڭىز. ريۋكزاكتىڭ سالماعىن ۇنەمى تەكسەرىپ وتىرىڭىز، ول بالاڭىزدىڭ سالماعىنىڭ 10-15 پايىزىنان اسپاۋى كەرەك.

دۇرىس قالىپ

بالاڭىزعا دۇرىس قالىپتا وتىرۋدى جانە تۇرۋدى ۇيرەتىڭىز. ول ءۇشىن مىنا ەرەجەلەردى ساقتاۋ كەرەك:

ارقاسى ءتۇزۋ، ال يىقتارى بوساڭسىعان بولۋى كەرەك؛

وتىرعان كەزدە اياقتارى ەدەنگە تەگىس ءتيىپ تۇرۋى كەرەك، ال تىزەلەرى تىك بۇرىشتا بۇگىلگەن بولۋى ءتيىس؛

سالماقتى كوتەرۋ كەزىندە (ريۋكزاكتى) بالا ارقاسىن ەمەس، اياعىن پايدالانۋى كەرەك.

دارىگەرگە تەكسەرىلىپ تۇرۋ

دارىگەرگە تەكسەرىلىپ تۇرۋ، سونىڭ ىشىندە ورتوپەديالىق تەكسەرۋدەن ءوتۋ سكوليوزدى ەرتە ستادياسىندا انىقتاۋعا كومەكتەسەدى. ول نەعۇرلىم ەرتە انىقتالسا، ونى ەمدەۋ سوعۇرلىم وڭاي بولادى.

ەكران الدىنداعى ۋاقىتتى شەكتەۋ

كومپتەردىڭ نەمەسە ۇيالى تەلەفوننىڭ الدىندا ۇزاق وتىرۋ ومىرتقاعا كۇش تۇسۋىنە جانە ارقانىڭ قيسايۋىنا اكەلۋى مۇمكىن. ەكران ۋاقىتىنا شەكتەۋ قويىڭىز جانە ۇزىلىستەر كەزىندە بالانىڭ سوزىلۋىن قاداعالاڭىز.

دۇرىس تاماقتانۋ

دۇرىس تاماقتانۋ سۇيەكتەر مەن بۇلشىقەتتەردى نىعايتۋعا كومەكتەسەدى. بالاڭىزعا سۇيەكتىڭ ساۋ دامۋى ءۇشىن قاجەت كالتسي مەن D دارۋمەنى بار تاعامدار بەرىڭىز. بالادا ارتىق سالماق بولماۋى كەرەك، سەبەبى بۇل ومىرتقاعا تۇسەتىن كۇشتى ارتتىرۋى مۇمكىن. دۇرىس تاماقتانۋ مەن تۇراقتى فيزيكالىق بەلسەندىلىكتى ساقتاڭىز.

سونىمەن قاتار، پەدياتر قازىرگى عىلىمعا سايكەس مەكتەپ ريۋكزاكتارى، ءتىپتى، اۋىر بولسا دا، سكوليوزعا سەبەپ بولا المايتىنىن اتاپ ءوتتى. دەگەنمەن، سالماق نورمالارىن ۇستانعان ءجون، ويتكەنى تىم كوپ اۋىر سومكە ارقا مەن بەلدىڭ اۋىرسىنۋىن تۋدىرادى، بۇل ءوز كەزەگىندە اۋىر سالدارلارعا اكەلۋى مۇمكىن.


سوڭعى جاڭالىقتار