ميكرونەسيەنى مۇلدە تولەمەي قويسا نە بولادى؟

استانا. قازاقپارات - زاڭگەر ماۋلەن سپانقۇلوۆ ميكرونەسيەنى مۇلدە تولەمەي قويسا نە بولاتىنىن ءتۇسىنىردى.

بۇل تۋرالى ول «بارىس مەدياعا» بەرگەن سۇحباتىندا ايتقان.

«ميكرونەسيەنى مۇلدە تولەمەگەن جاعدايدا، ەڭ بىرىنشىدەن، ءىس كوللەكتورلارعا وتەدى. ولار تۋىسقان، دوس، جۇمىسىڭىزعا حابارلاسادى. ونداي دا كەزدەر بولادى. ءبىراق ول كوللەكتورلار جاعىنان زاڭسىز. الايدا ولار سونى ىستەيدى»، - دەيدى مامان.

سودان كەيىن ءىس سوت ورىنداۋشىلارعا وتەدى.

«سوت ورىنداۋشى تەك شوتتارعا تىيىم سالىپ قانا قويمايدى. سوت ورىنداۋشى نەسيەنى تولەمەگەن ادامعا قازاقستان رەسپۋبليكاسىنان شىعۋعا تىيىم سالادى، جۇرگىزۋ كۋالىگىنە شەكتەۋ قويا الادى. سوسىن ءسىزدىڭ نوتاريالدىق ارەكەتتەرىڭىزگە تىيىم سالا الادى. ياعني ءسىز ءوز اتىڭىزعا بىرەۋگە ءتىپتى سەنىمحات جازا المايسىز. ال نوتاريالدىق ارەكەتتەرگە تىيىم سالسا ءسىز مۇلىك ساتا المايسىز دا، ساتىپ الا المايسىز دا»، - دەپ تۇسىندىرگەن زاڭگەر.

Massaget.kz