كورەيا- قازاقستان مادەني الماسۋ جىلى اياسىندا قانداي شارالار وتەدى
ەكى ەل دوستىعىن ناسيحاتتايتىن قانداي مادەني شارالار وتەتىنىنە شولۋ جاساۋدى ءجون كوردىك.
دەرەكتى فيلم
كورەيانىڭ ونەر اكادەمياسى قازاقستانداعى تەمىربەك جۇرگەنوۆ اتىنداعى ۇلتتىق ونەر اكادەمياسىمەن بىرلەسە وتىرىپ، «كورەيا جانە قازاقستان: دياسپورا ۋاقىتى مەن كەڭىستىكتەر قيىلىسى» اتتى تاقىرىپتا ءتورت دەرەكتى فيلم ءتۇسىرىپ جاتىر.
ءداستۇرلى كورسەتىلىم
23 -قىركۇيەكتە قازاقستانداعى الماتى تەاترىندا ۇلتتىق حالىق اسپاپتار وركەسترى مەن پانسوري شەبەرى، سونداي- اق قازاقتىڭ ءداستۇرلى اسپابى - دومبىرادا وينايتىن مۋزىكانت بىرلەسىپ كونسەرت وتكىزەدى. كونسەرتتە ءتۇرلى مۋزىكالىق شىعارمالار - ءداستۇرلى حالىق اندەرىنەن باستاپ، قازاق كومپوزيتورى ەركەش شاكەيەۆتىڭ كلاسسيكالىق شىعارمالارىنا دەيىن ەكى ەل اراسىنداعى دوستىقتى دارىپتەيتىن ۇلتتىق اسپاپتارمەن قايتا وڭدەلگەن زاماناۋي مۋزىكا ورىندالادى.
انيماتسيالىق فيلم
كورەيانىڭ «بۋچون» حالىقارالىق انيماتسيا فەستيۆالى جانە قازاقستاننىڭ «بايقوڭىر» حالىقارالىق قىسقامەتراجدى فيلمدەر فەستيۆالى بىرلەسىپ، انيماتسيالىق فيلمدەردىڭ ارنايى كورسەتىلىمىن ۇيىمداستىرادى. 8- قىركۇيەكتە قازاقستاندا «كورەي انيماتسياسىنىڭ ارنايى كورسەتىلىمى» وتەدى. وندا كورەيانىڭ 12 انيماتسيالىق فيلمى كورەرمەن نازارىنا ۇسىنىلادى، ونىڭ ىشىندە لي سونگ گانگتىڭ «ايا حانشايىمى» جانە رەجيسسەر ليم چە ريننىڭ «مەن جايلى» فيلمدەرى بار. اتالعان رەجيسسەرلەر ارنايى ءدارىس وتكىزىپ، كورەرمەندەرمەن كەزدەسەدى، ونىڭ ىشىندە «ايا حانشايىمىندا» ايا ءرولىن سومداعان ءانشى بەك ايەنمەن ديالوگ جوسپارلانعان. «قازاقستاندىق انيماتسيانىڭ ارنايى كورمەسى» اياسىندا 21 -قازاندا كورەيادا كەزەكتى «كورەي انيماتسياسىنىڭ ارنايى شوۋى» وتەدى.
جاستار تەاترى
كورەي حالىقارالىق مادەني الماسۋ قورى رەسپۋبليكالىق مەملەكەتتىك اكادەميالىق كورەي تەاترىمەن بىرلەسە وتىرىپ، قالىڭ كورەرمەنگە تەاتر تۋىندىسىن ساحنالاماق. قويىلىم 11 جانە 12 -قاراشادا قازاقستاننىڭ ۇلتتىق جانە مەملەكەتتىك تەاترلارىندا كورسەتىلەدى دەپ كۇتىلۋدە. ەكى ەل جاستارىنىڭ بۇل بىرلەسكەن قويىلىمى قازاقستان ۇلتتىق بانكىنىڭ ەسكەرتكىش مونەتاسىندا بەينەلەنگەن كورەي ميفولوگياسىنىڭ كەيىپكەرى - دانگۋننىڭ وقيعاسىنا نەگىزدەلگەن. بۇل تۋىندى اكادەميالىق كورەي تەاترىندا كورسەتىلەتىن بولادى.
ارنايى فوتوكورمە
14 -قاراشا مەن 8 -جەلتوقسان ارالىعىندا قازاقستان رەسپۋبليكاسىنىڭ ءا. قاستەيەۆ اتىنداعى مەملەكەتتىك ونەر مۇراجايىندا اتاقتى فوتوگراف كيم وك سوننىڭ جەكە كورمەسى وتەدى. كورمەدە فوتوگراف ءارتۇرلى سەبەپتەرمەن كوشىپ كەلگەن ادامداردىڭ ءومىرى مەن ماڭىزدى تاريحي وقيعالاردى قامتيتىن 50-دەن استام جۇمىستارىن ۇسىنادى.
