قازاقتىڭ قوس تازىسى شۆەيتسارياداعى الەم چەمپيوناتىندا تيتۋلدارعا يە بولدى
«سترانا بەلوۆوديا» (ش ق و) ءتالىمباعىنان شىققان «تۇمار» ەسىمدى تازى «تۇقىمنىڭ ۇزدىك وكىلى» جانە «جەنەۆاداعى الەم كۋبوگىنىڭ جەڭىمپازى» اتاقتارىنا لايىق تانىلدى. وسى ءتالىمباقتان شىققان ەكىنشى ءيت «ۆانگەليا» دا بىرنەشە تيتۋلعا يە بولدى، اتاپ ايتقاندا «قارسى جىنىستىڭ ۇزدىك وكىلى» جانە «جەنيەۆاداعى الەم كۋبوگىنىڭ ۇزدىك ارداگەرى» اتاندى.
قازاقستان كينولوگتەرى وداعىنداعى ۇلتتىق تازى كلۋبىنىڭ باسشىسى ەلەنا حاردينا بۇل جەڭىسكە 2006 -جىلدان بەرى تالپىنىپ كەلە جاتقاندارىن ايتادى.
«مەنىڭ مىندەتىم مىقتى جانە ساۋ تازىلاردى شىعارۋ، ولارمەن بارلىق حالىقارالىق كورمەلەرگە قاتىسۋ بولدى، ونداعى ماقسات - ءبىزدىڭ تۇقىمدى الەمنىڭ ءار جەرىندە كورسەتۋ»، - دەيدى ول.
ايتۋىنشا، ءبىزدىڭ يتتەرگە رەسەيدەن شىعىپ، يتاليادا تۇرىپ جاتقان تازىلار باسەكەلەس بولعان.
«وسى جەنەۆاداعى باسەكەلەستەرىمىز وسال بولمادى، تولقىدىق. ءبىراق، ءبىز جەڭدىك! وتە قۋانىشتىمىز، سەبەبى تازىنىڭ وتانى - قازاقستاننان شىققان يتتەر جەڭىلۋى مۇمكىن ەمەس. ءبىز الداعى ۋاقىتتا دا جەڭىس تۇعىرىندا بولۋىمىز كەرەك. 2016 -جىلعى الەم چەمپيوناتىندا جەڭگەنبىز، ول كەزدە بەلارۋستىك تازىلارمەن باسەكەلەستىك»، - دەيدى ە. حاردينا.
كينولوگ جەنيەۆادا تازىلارعا دەگەن قىزىعۋشىلىق جوعارى بولعانىن ايتادى.
«كورمەنى تاماشالاۋعا كەلگەندەردىڭ كوبى جانىمىزعا كەلىپ، يتتەرىمىز تۋرالى سۇراپ، فوتوعا ءتۇسىپ جاتتى. قىزىعۋشىلىق جوعارى بولدى»، - دەپ اتاپ ءوتتى ول.
ايتا كەتسەك، شۆەيتساريادا تۇراتىن قازاقستاندىق قاۋىمداستىق وكىلدەرى دەلەگاتسياعا قولداۋ ءبىلدىرۋ ءۇشىن كەلدى.
بۇعان دەيىن حابارلاعانىمىزداي، ميكرواۆتوبۋسپەن 12 ەلدىڭ شەكاراسىنان ءوتىپ، 8 مىڭ شاقىرىمعا جۋىق جەر جۇرگەن قازاقستاندىق كينولوگتەر كومانداسى جەنەۆاعا جەتتى.
