قاتەرلى ىسىككە شالدىققاندارعا ەلىمىزدە قانداي كومەكتەر كورسەتىلەدى
بۇل تۋرالى الماتى ونكولوگيالىق ورتالىعى كونسۋلتاتيۆتىك-دياگنوستيكالىق ءبولىمىنىڭ مەڭگەرۋشىسى ءنايلا اقجولوۆا ايتتى، دەپ حابارلايدى قازاقپارات ءتىلشىسى.
دارىگەردىڭ ايتۋىنشا، قاتەرلى ىسىكپەن اۋىراتىن ناۋقاستارعا ونكولوگيالىق كومەك ءبىرىنشى، ەكىنشى جانە ءۇشىنشى دەڭگەيدە كورسەتىلەدى. سونداي-اق، پاتسيەنتتەرگە جەكە مەديتسينالىق كومەك كورسەتۋدى قامتاماسىز ەتۋ ءۇشىن مەديتسينالىق كومەكتىڭ بارلىق دەڭگەيىندە كوپبەيىندى توپتار قۇرىلادى.
«الماتىداعى 76 ەمحانادا باستاپقى دەڭگەيدە ونكولوگيالىق كومەك كورسەتىلەدى. ەمحانا جۇمىسىنىڭ نەگىزگى ماقساتىنىڭ ءبىرى - قاتەرلى ىسىك اۋرۋىن ەرتە كەزەڭدە بەلسەندى تۇردە انىقتاۋ. وعان قول جەتكىزۋ ءۇشىن حالىقتىڭ ماقساتتى توپتارىنا سكرينينگتىك تەكسەرۋ جۇرگىزىلەدى. بۇگىنگى تاڭدا الماتىدا ماقساتتى حالىق توبىنىڭ 70 پايىزدان استامى سكرينينگتىك تەكسەرۋمەن قامتىلعان»، - دەدى دارىگەر.
ەگەر جالپى تاجىريبە دارىگەرى ىسىك اۋرۋىنا كۇدىكتەنسە نەمەسە دياگنوز قويىلسا، ناۋقاستى ارىقاراي تەكسەرۋ ءۇشىن ەمحاناداعى ونكولوگكە جىبەرەدى. ەگەر ونكولوگ قاتەرلى ىسىككە كۇدىكتى راستاسا، ناۋقاس الماتى ونكولوگيالىق ورتالىعىنىڭ كونسۋلتاتيۆتىك- دياگنوستيكالىق بولىمىنە جىبەرىلەدى.
«الماتى ونكولوگيالىق ورتالىعىندا ونكولوگ دياگنوزدى، ونكولوگيالىق پروتسەستىڭ تارالۋىن جانە اۋرۋدىڭ ساتىسىن، اۋرۋدىڭ قايتالانۋىن انىقتاۋ ءۇشىن قاجەتتى تەكسەرۋ مەن دياگنوستيكالىق زەرتتەۋلەر جۇرگىزەدى. كورسەتكىشتەرگە سايكەس، مۋلتيديستسيپلينارلىق توپتىڭ ۇسىنىسىن ەسكەرە وتىرىپ، پاتسيەنت مامانداندىرىلعان مەديتسينالىق كومەك، ونىڭ ىشىندە جوعارى تەحنولوگيالىق مەديتسينالىق قىزمەتتى الۋ ءۇشىن اۋرۋحاناعا جاتقىزىلادى نەمەسە وعان ىسىككە قارسى امبۋلاتورلىق تەراپيا كورسەتىلەدى»، - دەيدى ءنايلا اقجولوۆا.
دياگنوز قويىلعان ساتتەن باستاپ ونكولوگيالىق ناۋقاس تىركەلگەن جەرى بويىنشا امبۋلاتورلىق نەگىزدە مەديتسينالىق كومەك كورسەتەتىن ۇيىمدا ءومىر بويى مەديتسينالىق ديناميكالىق باقىلاۋدا بولادى.
«ەل، ايماق ىشىندە تۇرعىلىقتى جەرىن نەمەسە تىركەلگەن ۇيىمدى اۋىستىرۋ كەزىندە ناۋقاس ديناميكالىق باقىلاۋدان الىنبايدى، قۇجاتتاردى باستاپقى نە ەكىنشى دەڭگەيلى مەديتسينالىق ۇيىمعا جىبەرە وتىرىپ، جاڭا تىركەلگەن تۇرعىلىقتى جەرى بويىنشا كومەك الادى»، - دەپ اتاپ ءوتتى دارىگەر.
