ونلاين- كرەديت: قارىز الۋشىلارعا ارنالعان نۇسقاۋلىق

استانا. قازاقپارات - ونلاين- كرەديت قازاقستاندا كۇننەن-كۇنگە تانىمال بولىپ كەلەدى، ونىڭ وزىندىك سەبەبى دە بار - ولاردى وڭاي ءارى جىلدام رەسىمدەۋگە، ال اقشانى ءبىر تاۋلىكتىڭ ىشىندە، ءتىپتى بىرنەشە ساعاتتا الۋعا بولادى.

الايدا، باسقا كرەديتتەر سياقتى كرەديتتىڭ بۇل ءتۇرىنىڭ دە كۇڭگىرت تۇستارى بار. Fingramota.kz ونلاين- كرەديتتەر جايلى نەنى ءبىلۋ كەرەكتىگى جانە ولاردى رەسىمدەۋ ارقىلى تىعىرىققا تىرەلمەۋ ءۇشىن نە ىستەۋ كەرەكتىگى تۋرالى ماتەريال ۇسىنادى.

ونلاين-كرەديتتى كامەلەتتىك جاسقا تولعان كەز كەلگەن قازاقستاندىق ازامات از عانا قۇجاتتار توپتاماسىمەن الا الادى. كليەنتتەردى وسى نارسە قىزىقتىرادى، ولار وزدەرىنىڭ ۋاقىتتارىن ۇنەمدەيدى جانە بولىمشەگە كەلىپ، مەنەدجەرگە كەزەككە تۇرۋعا دايىن بولمايدى (دەگەنمەن، كەيبىر بانكتەردە سوڭىندا بولىمشەگە بارۋعا تۋرا كەلەدى).

ونلاين- كرەديت رەسىمدەۋ تەتىگى وڭاي: بانكتى تاڭداۋ، ونىڭ سايتىندا نە موبيلدى قوسىمشاسىندا ءوتىنىمدى تولتىرۋ جانە مامان سىزگە قايتا حابارلاسۋ ءۇشىن ءوزىڭىزدىڭ بايلانىس دەرەكتەرىڭىزدى قالدىرۋ كەرەك. كەيدە بۇل تالاپ ەتىلمەيدى جانە بارلىعى قوڭىراۋسىز - بانك قۇرعان الگوريتم ارقىلى جۇرگىزىلەدى. كليەنت تولىققاندى ساۋالنامانى تولتىرادى، ءوزىنىڭ دەربەس دەرەكتەرىن ەنگىزەدى، قاجەت بولعان جاعدايدا وزىنە قىزمەت كورسەتەتىن بانكتەن بەرىلگەن ءۇزىندى كوشىرمەنى قوسا بەرەدى جانە شەشىمدى كۇتەدى. اقشا وڭ شەشىم شىعارىلعاننان كەيىن دەرەۋ نەمەسە كەلەسى كۇنى تۇسەدى.

ونلاين- كرەديت تۇرلەرى

ونلاين- كرەديتتىڭ بىرنەشە ءتۇرى بار:

بانكتىك كرەديتتەر - ءبىز جوعارىدا سيپاتتاعان الگوريتم بويىنشا بانكتەردىڭ سايتىندا نەمەسە ولاردىڭ رەسمي موبيلدى قوسىمشاسى ارقىلى رەسىمدەلەدى؛

ميكروكرەديتتەر - بۇلار «ونلاين كرەديتتەر» ۇعىمىنا جاتادى، ويتكەنى ميكروقارجى ۇيىمدارى قارىزدى ونلاين رەجيمدە راسىمدەۋگە مۇمكىندىك بەرەدى. كەيبىر جاعدايلاردا (بانكتەردەگى سياقتى) سوڭعى قول قويۋ نەمەسە اقشا الۋ ءۇشىن فيليالعا كەلۋ قاجەت بولۋى مۇمكىن؛

ينتەرنەت- دۇكەندەردەگى كرەديتتەر - بەلگىلى ءبىر بانكتىڭ قوسىمشاسى ارقىلى ساتىپ الۋدى راسىمدەيتىن بولساڭىز، بۇل دا ونلاين- كرەديتكە جاتادى. بۇل جەردە العاشقى ەكى جاعدايعا قاراعاندا وڭايىراق، ويتكەنى بانكتە ءسىزدىڭ بارلىق دەرەكتەرىڭىز بار جانە ول ءبىر مينۋت نەمەسە ودان دا از ۋاقىت ىشىندە شەشىم قابىلدايدى؛

مامانداندىرىلعان سەرۆيستەردەگى كرەديتتەر - مۇندا جۇيە ءسىزدىڭ تىلەكتەرىڭىز بەن دەرەكتەرىڭىزدى الا وتىرىپ، ءسىز ءۇشىن ەڭ ءتيىمدى نۇسقانى ەسەپتەپ بەرەدى. ينتەرنەتكە شىعاتىن قۇرىلعى بولسا جانە تولىققاندى ءوتىنىم بەرسەڭىز جەتىپ جاتىر؛

كرەديتتىك كارتا - كوپتەگەن بانكتەر كليەنتتەرگە بەلگىلى ءبىر مولشەردە كرەديتتىك كارتا الۋعا مۇمكىندىك بەرەدى. ءبىر ەرەكشەلىگى - ءسىز قولما- قول اقشا المايسىز، ءبىراق الۋ ءۇشىن ماقۇلدانعان سوما نەگىزىندە زات ساتىپ العانىڭىز ءۇشىن اقى تولەيسىز، سودان كەيىن كارتانى اي سايىن جۇمسالعان سوماعا تولىقتىرىپ وتىراسىز.

سونداي-اق، بانكتىڭ باعدارلاماسىنا قاراي - اۆتوكرەديت، بيزنەس- كرەديتتەر، تۇتىنۋشىلىق كرەديت جانە ت. ب. سياقتى قارىزدىڭ نەعۇرلىم مامانداندىرىلعان تۇرلەرى بار.

نازار اۋدارىڭىز! كۇمان تۋعىزاتىن سايتتاردان كرەديت بەرۋ جونىندەگى قوسىمشالاردى جۇكتەمەڭىز - ءاردايىم كرەديتتىك ۇيىمنىڭ قر قارجى نارىعىن رەتتەۋ جانە دامىتۋ اگەنتتىگى بەرگەن ليتسەنزياسىنىڭ بار- جوعىن سايت ارقىلى تەكسەرىڭىز. تەكسەرمەگەن جاعدايدا ءسىز قارجىلىق الاياقتاردىڭ قۇربانى بولۋىڭىز مۇمكىن!

ونلاين- كرەديتتىڭ ارتىقشىلىقتارى مەن كەمشىلىكتەرى

ارتىقشىلىقتارى:

ۋاقىتتى ۇنەمدەۋ - كرەديت بەرۋگە بايلانىستى راسىمدەر تەز جۇزەگە اسىرىلادى جانە ونىڭ ەڭ باستى شارتتارىنىڭ ءبىرى - ينتەرنەت بولۋعا ءتيىس. مەنەدجەر سىزگە قوڭىراۋ شالسا دا، بۇل كوپ ۋاقىتتى قاجەت ەتپەيدى جانە ءسىزدىڭ جۇمىس كەستەڭىز بۇزىلمايدى؛

قۇجاتتاردىڭ ەڭ از توپتاماسى - ونلاين كرەديتتى راسىمدەۋ ءۇشىن ادەتتە جسن جەتكىلىكتى، ونى ەنگىزگەننەن كەيىن جۇيەدەن ءسىز تۋرالى اقپارات، ونىڭ ىشىندە زەينەتاقى اۋدارىمدارىڭىز بەن كرەديتتىك تاريحىڭىز تۋرالى اقپارات شىعادى؛

امبەباپتىلىق - ءسىز بەلگىلى ءبىر ماقساتقا اقشا الا الاسىز؛

جەدەلدىلىك - اقشا تەز تۇسەدى، كەيدە شارتقا نەمەسە سوڭعى وتىنىمگە قول قويىلعاننان كەيىن بىرنەشە مينۋت ىشىندە تۇسەدى.

كەمشىلىكتەرى:

جوعارى پايىزدىق مولشەرلەمە - كرەديت ۇيىمدارى ونلاين كرەديت بەرگەن كەزدە پايىزدارىن جوعارى قويۋى مۇمكىن. وسىلايشا ولار ىقتيمال تاۋەكەلدەردىڭ ورنىن تولتىرادى؛

قوسىمشا كوميسسيالار - كەيبىر كرەديتتىك ۇيىمدار كرەديتتىڭ جالپى سوماسىنا قوسىلاتىن نەمەسە نەمەسە اي سايىنعى تولەمدەرگە ءبولىنۋى مۇمكىن كوميسسيالاردى تولەۋدى مىندەتتى تالاپ ەتىپ قويۋى مۇمكىن؛

شاعىن سومالار جانە قىسقا مەرزىمگە كرەديت بەرۋ - كرەديت ۇيىمدارىنىڭ بارلىعى دەرلىك قوماقتى اقشانى ونلاين بەرۋگە دايىن ەمەس، سوندىقتان ماقۇلدانعان سوما ءسىزدىڭ قاجەتتىلىگىڭىزدى وتەمەۋى مۇمكىن. سونىمنە قاتار، كرەديتتەۋ مەرزىمى وتە قىسقا بولۋى مۇمكىن، تيىسىنشە اي سايىنعى تولەم دە ءسىزدىڭ باستاپقىدا بولجاعان مولشەرىڭىزدەن كوپتەۋ بولادى.

ونلاين- كرەديت رەسىمدەگەن كەزدەگى قاۋىپسىزدىك قاعيدالارى

ەگەردە ءسىز ونلاين- كرەديت الۋعا بەل بۋساڭىز، ءوزىڭىزدىڭ ناقتى كىرىستەرىڭىزدى ارتىعىمەن كورسەتپەڭىز جانە كرەديت ۇيىمىن الداماڭىز. بانك نەمەسە ميكروقارجى ۇيىمى سىزگە كرەديتتى ماقۇلداۋى ىقتيمال، ال تولەم بيۋدجەتىڭىزگە سالماق ءتۇسىرۋى مۇمكىن.

ونلاين- كرەديتتەر رەسىمدەگەن جاعدايدا بارلىق جاعدايدا قولدانىلاتىن قاعيدانى ۇمىتپاعان ءجون، ياعني اقشا شوتقا ۋاقتىلى كەلىپ ءتۇسۋى ءۇشىن، بەرەشەكتى ۋاقتىلى، ءتىپتى تولەم كۇنىنە بەس- جەتى جۇمىس كۇنى قالعاندا تولەگەن دۇرىس. سولاي ءسىز ءوزىڭىزدى قاۋىپتەن ساقتاپ، كرەديتتى وتەۋدىڭ بالاما تاسىلدەرىنە ۋاقىتىڭىزدى جۇمسامايتىن بولاسىز.

ەگەر ءسىز تولەم مەرزىمىن قالاي دا كەشىكتىرىپ العان بولساڭىز، كرەديتوردان جاسىرىنۋدىڭ قاجەتى جوق، دۇرىسى - وعان حابارلاسىپ، كەشىكتىرۋ سەبەبىن ءتۇسىندىرىڭىز. ولاي بولماعان جاعدايدا، تولەۋ مەرزىمدەرىن ەلەمەسەڭىز، بانك نەمەسە ميكروقارجى ۇيىمى سوتقا تالاپ ارىزبەن جۇگىنۋگە قۇقىلى بولادى. مۇنىڭ ءبارى ءسىزدىڭ كرەديتتىك تاريحىڭىزعا اسەر ەتەدى جانە بانك سىزگە كرەديت شۇعىل تۇردە كەرەك بولىپ، تابىسىڭىزدىڭ كوپ بولعانىنا قاراماستان، تاۋەكەلگە بارعىسى كەلمەي، بولاشاقتا سىزگە قارىز بەرمەۋى دە مۇمكىن. بۇدان باسقا، ءسىزدىڭ بانكتەگى شوتىڭىزدى بۇعاتتاپ تاستاۋى ىقتيمال، ال وعان كەلىپ تۇسەتىن قاراجاتتىڭ بارلىعى بورىشتى تولەۋگە ۇستالىپ، كۇندەلىكتى كەرەك- جاراقتارىڭىزعا اقشا قالماۋى مۇمكىن.

تومەن پايىزدىق مولشەرلەمەلەر مەن قوماقتى سومانى ۋادە ەتەتىن ماركەتولوگتەر مەن ەلىكتىرەتىن جارنامالارعا سەنبەڭىز. كەز كەلگەن قارىز قاراجاتى، ونىڭ ىشىندە ونلاين- كرەديتتىڭ قاي كەزدە بولماسىن قارىز ەكەنىن، ونى ءسىز بىرنەشە ەسە ارتىعىمەن قايتارۋعا مىندەتتى ەكەنىڭىزدى ەستەن شىعارماڭىز.

كرەديت رەسىمدەي وتىرىپ، جۇمىسىڭىزدان ايىرىلعان نەمەسە كۇتپەگەن شىعىندار بولعان جاعدايدا، ءسىزدىڭ قارىزدى ۋاقىتىندا تولەي الۋىڭىز جانە كرەديتتىك تاريحىڭىزدى بۇزباۋ ءۇشىن وزىڭىزگە كەمىندە 6-ايلىق جالاقى مولشەرىندەگى قارجىلىق قاۋىپسىزدىك «جاستىقشاسىن» قامتاماسىز ەتىڭىز.