قاسىم-جومارت توقايەۆ پەن ەمومالي راحمون كەڭەيتىلگەن قۇرامدا كەلىسسوز جۇرگىزدى

استانا. قازاقپارات - قازاقستان پرەزيدەنتى قاسىم-جومارت توقايەۆ پەن تاجىكستان پرەزيدەنتى ەمومالي راحمون كەڭەيتىلگەن قۇرامدا كەلىسسوز جۇرگىزدى، دەپ حابارلايدى قازاقپارات.

مەملەكەت باسشىسى قازاقستاندا تاجىكستانمەن دوستىق قارىم-قاتىناستى جوعارى باعالايتىنىن اتاپ ءوتتى.

«باۋىرلاس تاجىك حالقىنا قازاق جەرىندە ايرىقشا قۇرمەتپەن قارايدى. وتانداستارىمىز قازىرگى تاجىكستان تۋرالى كوبىرەك ءبىلىپ، تاجىك حالقىنىڭ باي مادەنيەتىمەن تەرەڭىرەك تانىسقىسى كەلەدى. وسى ورايدا ءسىزدىڭ وسىنداي اۋقىمدى ءىس-شارالار ۇيىمداستىرۋ تۋرالى باستاماڭىزدى قازاقستان حالقى مەن ەلىمىزدىڭ قوناقتارى ەرەكشە ىقىلاسپەن قابىل الدى. بۇل ايتۋلى شارا ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولعان كەزەڭدە وتكىزىلۋىنىڭ ەرەكشە سيمۆولدىق ءمانى بار»، - دەدى پرەزيدەنت.

مەملەكەت باسشىسى بارلىق سالاداعى ەكىجاقتى ىنتىماقتاستىقتىڭ، سونىڭ ىشىندە سۋ جانە ەنەرگەتيكا كەشەنىندەگى ءوزارا ءىس-ارەكەتتىڭ قارقىندى دامىپ كەلە جاتقانىن اتاپ ءوتتى.

«سۋ جانە ەنەرگەتيكا سالالارىنداعى مىندەتتەمەلەردى ورىنداۋعا، اتاپ ايتقاندا، قازاقستانعا سۋ جانە ەلەكتر ەنەرگياسىن جەتكىزۋگە بايلانىستى شەشىمدى ۋاقتىلى قابىلداعانىڭىز ءۇشىن سىزگە جانە بارشا تاجىك تاراپىنا العىسىمىز شەكسىز. قازاقستان ءوز تاراپىنان ءسىزدىڭ الدىڭعى ساپارىڭىز كەزىندە ءوزارا كەلىسكەن بارلىق مىندەتتەمەنى ورىنداپ جاتىر»، - دەپ اتاپ ءوتتى قاسىم-جومارت توقايەۆ.

قاسىم-جومارت توقايەۆ تاجىكستان پرەزيدەنتى ەمومالي راحموننىڭ مامىر ايىندا قازاقستانعا ساپارى كەزىندە قول قويىلعان قازاقستان مەن تاجىكستان اراسىنداعى وداقتاستىق ءوزارا ءىس-قيمىل تۋرالى دەكلاراتسيانىڭ ءساتتى جۇزەگە اسىرىلىپ جاتقانىن اتاپ ءوتتى

پرەزيدەنتتىڭ ايتۋىنشا، بيىل 6 ايدا تاۋار اينالىمى 500 ميلليون دوللاردان اسقان. بۇل رەتتە ءوزارا ساۋدا-ساتتىق كولەمىن 2 ميلليارد دوللارعا دەيىن ارتتىرۋ جوسپارلانىپ وتىر.

ەمومالي راحمون دا ەكىجاقتى ىنتىماقتاستىقتىڭ قازىرگى جاعدايىنا جوعارى باعا بەردى

- تاجىكستاننىڭ مادەنيەت كۇندەرىن جانە كورمەسىن، سونداي-اق ەلىمىزدىڭ اۋىل شارۋاشىلىعى مەن ونەركاسىپ سەكتورى ونىمدەرىنىڭ جارمەڭكەسىن استانا، الماتى جانە شىمكەنت قالالارىندا وتكىزۋگە قولداۋ كورسەتكەنىڭىز ءۇشىن العىس ايتامىن. بۇل شارالاردى تاجىكستان مەن قازاقستان اراسىنداعى قارىم-قاتىناستىڭ، ستراتەگيالىق سەرىكتەستىك پەن وداقتاستىقتىڭ ۇزدىكسىز دامۋىنىڭ ءبىر بەلگىسى دەپ باعالايمىز. بۇل شارالار ەكى ەل اراسىنداعى ديپلوماتيالىق قارىم- قاتىناستاردىڭ ورناعانىنا 30 جىل تولعان كەزەڭدە ءوتۋىنىڭ وزىندىك ءمانى بار. بۇگىندە ەلدەرىمىز اراسىنداعى قارىم- قاتىناستىڭ ءوزارا تۇسىنىستىك، جوعارى قۇرمەت پەن سەنىمگە نەگىزدەلگەنى قۋانتادى. بايلانىستارىمىزدى ودان ءارى نىعايتۋ تاجىكستاننىڭ سىرتقى ساياساتىنىڭ نەگىزگى باسىمدىعى بولىپ قالا بەرەدى، - دەدى تاجىكستان پرەزيدەنتى.

اڭگىمەلەسۋ بارىسىندا ساۋدا- ەكونوميكا، كولىك-لوگيستيكا، اۋىل شارۋاشىلىعى، ەنەرگەتيكا، قارجى جانە مادەني-گۋمانيتارلىق سالالارداعى ءوزارا ءىس-ارەكەتتى ودان ءارى دامىتۋ پەرسپەكتيۆالارى تالقىلاندى.