بولاشاق ەرلى-زايىپتىلارعا «باقىتتى وتباسى» جادىناماسى ازىرلەنىپ جاتىر

None
استانا. قازاقپارات - بولاشاق ەرلى-زايىپتىلار ءۇشىن «باقىتتى وتباسى» جادىناماسى ازىرلەنۋ ۇستىندە.

بۇل تۋرالى اقپارات جانە قوعامدىق دامۋ مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.

«اقپارات جانە قوعامدىق دامۋ مينيسترلىگى بۇۇ حالىقتىڭ قونىستانۋى قورىمەن (ي ۋ ن ف پ ا) بىرلەسىپ، وڭ وتباسىلىق داستۇرلەردى ساقتاۋ، وتباسىن جوسپارلاۋ جانە ەرلەر مەن ايەلدەردىڭ رەپرودۋكتيۆتى دەنساۋلىعىن ساقتاۋ ماسەلەلەرى بويىنشا نەكەگە تۇراتىن جۇپتاردىڭ حاباردار بولۋىن ارتتىرۋ تۇجىرىمداماسىن ازىرلەدى. بۇل تۇجىرىمدامانىڭ نەكەنى رەسمي تىركەۋدىڭ الدىنداعى كەزەڭدە گەندەرلىك تەڭدىك، رەپرودۋكتيۆتى دەنساۋلىق جانە سانالى اتا-انا بولۋ پروبلەمالارىن قوسا العاندا، وتباسى ءومىرىنىڭ كەڭ اۋقىمدى ماسەلەلەرى بويىنشا قاجەتتى اقپارات بەرۋ ارقىلى ازاماتتاردىڭ قۇقىقتارى مەن مۇددەلەرىن قورعاۋدى قامتاماسىز ەتۋ سالاسىنداعى مەملەكەتتىڭ الەۋەتىن كەڭەيتەتىن ماڭىزى بار. حاباردارلىقتى ارتتىرۋ تەتىكتەرىن دامىتۋ ترەنينگتەر وتكىزۋ ارقىلى جوسپارلانۋدا»، - دەپ اتاپ وتەدى مينيسترلىكتەن اگەنتتىك تىلشىسىنە بەرگەن جاۋابىندا.

ۆەدومستۆو مالىمەتىنشە، وسى جىلدىڭ سوڭىنا دەيىن اجىراسۋ دەڭگەيى جوعارى جەكەلەگەن وڭىرلەردە نەكەنى تىركەۋگە ءوتىنىش بىلدىرگەن ازاماتتارعا وتباسىن جوسپارلاۋ جانە وتباسىلىق پسيحولوگيا، رەپرودۋكتيۆتى دەنساۋلىق، وتباسىلىق بيۋجەتتى جوسپارلاۋ جانە باسقا دا ماڭىزدى ماسەلەلەر بويىنشا وقىتۋ پيلوتتىق جوبا ىسكە قوسىلادى.

وقىتۋ تەگىن. ءار ترەنينگتىڭ ۇزاقتىعى - التى استرونوميالىق ساعات.

ونىڭ بارىسىندا قاتىسۋشىلار تاۋەلسىز تاقىرىپتىق بلوكتاردى يگەرۋگە مۇمكىندىك الادى: سەرىكتەستىك جانە جاۋاپكەرشىلىك؛ وتباسىن جوسپارلاۋ جانە رەپرودۋكتيۆتى دەنساۋلىق؛ قۇقىقتىق ساۋاتتىلىق؛ تۇرمىستىق زورلىق-زومبىلىققا نولدىك توزىمدىلىك؛ قارجىلىق ساۋاتتىلىق؛ ەموتسيونالدى ينتەللەكت جانە وتباسى ىشىندەگى جانە ودان تىس قارىم-قاتىناس داعدىلارى.

نەكەگە دەيىنگى ترەنينگتەن ءوتۋ تۋرالى شەشىم قابىلداعان ەرلى-زايىپتىلار بارلىق مودۋلدەردى ءبىر كۇندە يگەرە الادى نەمەسە بەلگىلى ءبىر تاقىرىپتىق مودۋلدەردى اياقتاۋعا تىركەلىپ، بىرنەشە كۇن بويى وقۋدان وتەدى.

ترەنينگتەر وففلاين جانە ونلاين رەجيمىندە وتكىزىلەدى. ۇزاق مەرزىمدى پەرسپەكتيۆادا (10 جىل) سيفرلاندىرۋدى تەرەڭدەتۋ ونلاين رەجيمگە تولىق كوشۋدى قامتاماسىز ەتۋگە مۇمكىندىك بەرەدى.

ترەنينگ بارىسىندا ۇسىنىلاتىن اقپاراتتىڭ جوعارى ساپاسى مامانداردىڭ بەينە دارىستەرىن پايدالانۋدى جانە بىلىكتى جاتتىقتىرۋشىلاردىڭ جۇمىسىن كوزدەيتىن كومبو-فورماتتى قولدانۋ ارقىلى قامتاماسىز ەتىلەدى.

وسى شارانى ىسكە اسىرىپ، ونى ەنگىزۋدىڭ اسەرىن باعالاعاننان كەيىن وڭىرلەر سانىن ۇلعايتۋ تۋرالى ماسەلە قارالادى.

«سونداي-اق، ب ۇ ۇ حالىقتىڭ قونىستانۋى قورىمەن بىرلەسىپ، بولاشاق ەرلى-زايىپتىلار ءۇشىن «باقىتتى وتباسى» جادىناماسى ازىرلەنۋدە. جادىنامادا قازىرگى وتباسى ينستيتۋتىنا ءتان تاۋەكەلدەردى ازايتۋعا مۇمكىندىك بەرەتىن ۇسىنىستار جازىلادى. مۇنداي تاۋەكەلدەرگە تۇرمىستىق زورلىق-زومبىلىق، رەپرودۋكتيۆتى ديسفۋنكتسيا مەن بەدەۋلىك، اتا-انالىق جاۋاپكەرشىلىك پەن سەرىكتەستىك تەڭدىكتىڭ جوقتىعى جاتادى. جادىناما ازىرلەنگەننەن كەيىن ەلەكتروندىق ۇكىمەت پورتالىندا ورنالاستىرىلۋى مۇمكىن. بۇدان باسقا، نەكەنى تىركەۋگە ءوتىنىش بەرگەن ازاماتتاردى وسى ماتەريالدارمەن مىندەتتى تۇردە تانىستىرۋ جونىندەگى وپتسيا كوزدەلۋدە»، - دەپ اتاپ وتەدى مينيسترلىكتەن.

سوڭعى جاڭالىقتار