ەلوردادا ورىسشاعا قاراعاندا قازاقشا وقىتاتىن مەكتەپتەردىڭ ءبىلىم ساپاسى جوعارى - باسقارما
بۇل تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ ايتتى، دەپ حابارلايدى قازاقپارات ءتىلشىسى.
بۇگىن ەلوردادا بولعان رەسپۋبليكالىق تامىز كەڭەسىنەن كەيىن تىلشىلەر باسقارما باسشىسىنان قالادا ورىسشا جانە قازاقشا وقىتاتىن مەكتەپتەردىڭ ءبىلىم دەڭگەيىنە قاتىستى سۇراق قويدى.
«قازاق مەكتەپتەرىندە ءبىلىم ساپاسى جوعارى. شامامەن 4 پايىز جوعارى تۇر. بۇل تۇرعىدا قازاق مەكتەپتەرىندەگى مۇعالىمدەردىڭ دەڭگەيى مەن وقىتۋ ساپاسى جاقسى»، - دەدى ق. سەنعازىيەۆ.
وسى ورايدا تىلشىلەر «قوعامدا قازاق مەكتەپتەرىنە قاراعاندا ورىس مەكتەپتەرىندە جاقسى ساباق بەرەدى دەگەن ستەرەوتيپتىڭ ورنىعىپ كەتۋىنە نە سەبەپ» بولعانىن سۇرادى.
ءوز كەزەگىندە باسقارما باسشىسى بۇل ماسەلە كوبىنە اتا-انالارعا قاتىستى ەكەنىن ايتتى.
«مەن بالانى بەلگىلى ءبىر مەكتەپكە بەرۋگە ماجبۇرلەي المايمىن. بۇل اتا-انانىڭ تاڭداۋى، وقۋشىنىڭ تاڭداۋى»، - دەدى قاسىمحان سەنعازىيەۆ.
جاقىندا استانا حالىقارالىق ۋنيۆەرسيتەتى جانىنداعى پەداگوگيكا ينستيتۋتىنىڭ ديرەكتورى جاننا احمادييەۆا تالاپكەرلەر پەداگوگيكالىق جوعارى وقۋ ورىندارىنىڭ ورىس بولىمشەسىنە بارۋعا نيەتتى ەمەس ەكەنىن ايتقان ەدى.
