مۇعالىم بولعىسى كەلەتىن تالاپكەرلەر سانى ارتىپ كەلەدى - ۆيتسە-پرەمەر
بۇل تۋرالى پرەمەر- ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.
«تەك بيىلدىڭ وزىندە عانا مەملەكەتتىك گرانتقا ۇمىتكەرلەدىڭ ءاربىر ءتورتىنشىسى، سونىمەن قاتار 1,5 مىڭنان استام التىن بەلگى يەگەرى مۇعالىم بولعىسى كەلدى. ەستەرىڭىزدە بولسا، وسىدان نە ءبارى 5 جىل بۇرىن پەداگوگيكالىق ماماندىقتارعا تالاپكەرلەر 50 بالمەن تۇسسە، بۇگىندە شەكتى بال - 111»، - دەدى تامارا دۇيسەنوۆا ءبىلىم سالاسى قىزمەتكەرلەرىنىڭ رەسپۋبليكالىق تامىز كەڭەسىندە.
ونىڭ اتاپ وتۋىنشە، بۇل مۇعالىم كاسىبي مارتەبەسىنىڭ ارتىپ كەلە جاتقانىن، پەداگوگيكالىق كورپۋستىڭ ساپالى نىعايعانىن جانە قابىلدانعان مەملەكەتتىك ءىس-شارالاردىڭ دۇرىستىعىن بىلدىرەدى.
«ءبىلىم بەرۋ جۇيەسىندە بەلگىلەنگەن كورسەتكىشتەرگە قول جەتكىزۋگە باعىتتالعان قاراجات كولەمى تەك سوڭعى 5 جىلدا عانا ەكى ەسەگە نەمەسە 2 دەن 4,5 تريلليون تەڭگەگە دەيىن ارتتى. بۇگىندە وسىنداي قاراجات قازاقستاننىڭ ءبىلىم جۇيەسىنە جۇمسالۋدا. دەگەنمەن، جاڭا جاعداي الدىمىزعا جاڭا مىندەتتەردى دە جۇكتەيتىندىگىن ءتۇسىنۋ قاجەت»، - دەدى مينيستر.
