جاڭا وقۋ جىلىندا ءبىرتۇتاس تاربيە باعدارلاماسى ىسكە اسىرىلادى - مينيستر
بۇل تۋرالى ەلوردادا ءوتىپ جاتقان رەسپۋبليكالىق تامىز كەڭەسىندە اتالعان مينيسترلىكتىڭ باسشىسى عاني بەيسەمبايەۆ ايتتى، دەپ حابارلايدى قازاقپارات ءتىلشىسى.
«ورتا ءبىلىم بەرۋ مازمۇنىن ودان ءارى جەتىلدىرۋ جۇمىستارى جالعاسىپ كەلەدى. وسى جىلى وقۋلىقتاردىڭ 80 پايىزى سيفرلىق فورماتقا كوشىرىلدى. العاش رەت اۋىل مەكتەپتەرى مەن شاعىن جيناقتى مەكتەپتەردى قولداۋ جۇمىستارىن باستادىق. بۇل جوبا پيلوتتىق رەجيمدە اقتوبە وبلىسىندا جۇزەگە اسىرىلا باستادى. ونىڭ ماقساتى - يننوۆاتسيالىق ادىستەردى پايدالانا وتىرىپ، اۋىلدىق جانە قالالىق مەكتەپتەر اراسىنداعى ءبىلىم بەرۋ ساپاسىنىڭ الشاقتىعىن قىسقارتۋ»، - دەدى ع. بەيسەمبايەۆ.
ونىڭ ايتۋىنشا، وقۋشىلاردىڭ الەۋەتىن دامىتۋ ءۇشىن بىلتىر زاڭنامالىق دەڭگەيدە حالىقارالىق وليمپيادالاردىڭ جەڭىمپازدارىنا جانە ولاردى دايىنداعان پەداگوگتەرگە ماتەريالدىق سىياقى تولەۋ نورماسى ەنگىزىلدى.
«ماسەلەن، وتكەن وقۋ جىلىندا قازاقستاندىق وقۋشىلار 312 مەدال (43 التىن، 95 كۇمىس جانە 174 قولا) جەڭىپ الدى. 27 جەڭىمپاز جانە 26 پەداگوگ 500 دەن 1500 ايلىق ەسەپتىك كورسەتكىشكە دەيىن سىياقى الدى. الەۋمەتتىك وسال ساناتتاعى وتباسىلاردىڭ بالالارىنا ەرەكشە نازار اۋدارىلىپ وتىر. قازىر 421 وقۋشىعا «ءبىلىم- يننوۆاتسيا ليتسەيىندە»، «دارىن»، رەسپۋبليكالىق فيزيكا- ماتەماتيكا مەكتەپتەرىندە وقۋعا مۇمكىندىك بەرىلدى»، - دەدى مينيستر.
ونىڭ سوزىنە قاراعاندا، بيىلدان باستاپ تاربيە جۇمىسىنىڭ ءرولىن كۇشەيتۋگە كوپ كوڭىل بولىنبەك. وسىعان بايلانىستى، جاڭا وقۋ جىلىنان باستاپ بارلىق ءبىلىم بەرۋ ۇيىمدارىندا اتا- انالاردى پەداگوگيكالىق قولداۋ ورتالىعى جۇمىسىن باستايدى. ولاردىڭ باستى باسىمدىقتارى - بالالاردى وقىتۋ مەن تاربيەلەۋدە وتباسى مەن مەكتەپتىڭ ءوزارا ءىس- قيمىلى بويىنشا جۇمىستى كۇشەيتۋ جانە اتا- انالاردىڭ ءپوزيتيۆتى مادەنيەتىن دامىتۋ.
«ۇلتتىق قۇرىلتايدىڭ وتىرىسىندا مەملەكەت باسشىسى ءبىلىم بەرۋ سالاسىنا قاتىستى ءبىرقاتار نەگىزگى مىندەتتەرگە توقتالدى.
«ۇلتتىق تاربيە - ەل بولاشاعى» تاربيەسىنىڭ تۇجىرىمدامالىق نەگىزدەرى ەنگىزىلىپ جاتىر. جاڭا وقۋ جىلىنان باستاپ 2023-2025 -جىلدارعا ارنالعان ءبىرتۇتاس تاربيە باعدارلاماسى ىسكە اسىرىلا باستايدى. بۇل قۇجات جالپى ادامزاتتىق جانە ۇلتتىق قۇندىلىقتار نەگىزىندە وسكەلەڭ ۇرپاقتى تاربيەلەۋ ساپاسىن ارتتىرۋعا باعىتتالعان. ءبىز وقۋ ساۋاتتىلىعىنىڭ ءرولىن كۇشەيتۋگە، «وقۋعا قۇشتار مەكتەپ» جوباسى اياسىندا كىتاپ ارقىلى تاربيەلەۋگە كوپ كوڭىل بولەمىز. قازىر ءبىلىم بەرۋ ۇيىمدارىنداعى كوركەم ادەبيەت قورى 3,7 ميلليون داناعا ۇلعايدى. سونداي-اق، مەملەكەت باسشىسىنىڭ تاپسىرماسى بويىنشا «بالالار كىتاپحاناسى» جوباسى ىسكە اسىرىلىپ جاتىر. ونىڭ اياسىندا مەكتەپ كىتاپحانالارىنىڭ قورىن وتاندىق جانە الەمدىك ادەبيەتتىڭ ۇزدىك ۇلگىلەرىمەن تولىقتىرۋ جوسپارلانىپ وتىر. بۇل جوبا ۇلتتىق قۇندىلىقتار نەگىزىندە بالالاردى تاربيەلەۋگە جانە جالپى كىتاپقا دەگەن قىزىعۋشىلىقتى وياتۋعا باعىتتالعان»، - دەدى عاني بەيسەمبايەۆ.
ەسكە سالساق، بىلتىر ۇكىمەت ءبىلىم بەرۋ ۇيىمدارىنداعى ءبىرتۇتاس تاربيە بەرۋ تۇجىرىمداماسىن ازىرلەۋدى تاپسىرعان ەدى.
