ۆيزاسىز رەجيم - ەلگە تۋريست تارتۋدىڭ باستى تەتىگى
بيىلعى قاڭتار مەن شىلدە ايىنىڭ ارالىعىندا ەلدەگى قوناقۇيلەرگە 730 مىڭعا جۋىق شەتەل ازاماتى توقتاعان. كەلگەن شەتەلدىكتەردىڭ ءبىرازى كوۋچسەرفينگ ارقىلى دا قازاقستاندىقتاردىڭ ءۇيىن پانالايدى. ەلگە كەلگەن تۋريستەردىڭ اسەرى قانداي؟
ياكۋتيالىق الەكساندر يۆانوۆتىڭ ەپتەپ شاڭقوبىز تارتاتىن ونەرى بار. ءوزى اۆتوستوپپەن قازاقستاننىڭ ءبىراز قالاسىن شارلاپ شىققان. ايتۋىنشا، جولدا كولىك توقتاتپاس بۇرىن، وسىلاي اسپابىندا ويناپ، دۇعا تىلەيدى ەكەن. الەكساندر يۆانوۆ، ياكۋتيالىق تۋريست:
- ءبىز اسپان مەن جەردىڭ تاڭىرىنە سەنەمىز عوي. ساپارعا شىققاندا «جولىمىز اشىق بولسىن، جاقسى ادامدار كەزدەسسىن دەپ» جولعا اس تارتۋ ىرىمىن جاسايمىز. ياعني، جولعا نان نەمەسە قۇيماقتى قويامىز. سوسىن وسىلاي شاڭقوبىزدا وينايمىز. ءسويتىپ، ساپارىمىز ءساتتى ءوتسىن دەپ تىلەيمىز.
ياكۋتيا ازاماتى كوۋچسەرفينگ سەرۆيسى ارقىلى ءوز ۇيىندە تالاي مەيماندى كۇتكەن. الىس- جاقىن شەتەلدەن كەلەتىن قوناقتار وعان شاڭقوبىزدارىن سىيلاپ كەتەدى ەكەن. شاعىن توپتاماسىنا بۇل جولى قازاق اسپابى قوسىلدى. «قازاقستانداعى ساياحاتىم مەن ويلاعاننان دا اسىپ ءتۇستى» ، دەيدى الەكساندر.
الەكساندر يۆانوۆ، ياكۋتيالىق تۋريست:
- استانادان قاراعاندىعا جولعا شىققانىمىز قىزىق بولدى. ءۇش جولاۋشى جولدىڭ بويىنا كەشتەتە شىققان ەدىك. ءبىزدى دوسمۇقاسان ەسىمدى ازامات كولىگىنە مىنگىزدى. سويتسە، ول سونداعى ۇن تارتۋ زاۋىتىنىڭ باسشىسى بولىپ شىقتى. ول ءبىزدى ءوزىنىڭ تۋىسىنداي جاقسى كۇتتى. ءبىز ونىڭ قوناقجايلىعىنا تاڭقالدىق. ءوز پاتەرىنە اپارىپ قوندىردى. قالانى ارالاتتى، نەبىر مەيرامحانادان ءدام تاتقىزدى. ءبىز وعان قاتتى ريزا بولدىق.
الەكساندردىڭ ايتۋىنشا، ەلىمىزدەگى كوۋچسەرفينگ سەرۆيسى ۇلكەن قالالاردا جاقسى دامىعان. اۋىلدى جەردە جوق. ءبىراق اۋىل حالقى ونسىز- اق قۇدايى قوناعىن سىيلاپ كۇتىپ الادى. جالپى ەلىمىزدە كوۋچسەرفينگكە تىركەلگەن 178 مىڭنان استام ادام شەتەلدىك مەيمانداردى كۇتىپ الا الادى. 315 مىڭ ادام سولاردىڭ ۇيىندە تۇنەپ، قازاقستاندى ارالاماق نيەتتە. قوناقۇيلەرگە ايالدايتىن مەيماندارعا توقتالساق:
بيىل 7-ايدا e-Qonaq جۇيەسىندە 728 مىڭ 876 شەتەلدىك تۋريست تىركەلگەن. الماتى، اتىراۋ، ماڭعىستاۋ وبلىستارىنىڭ قوناقۇيلەرى ەڭ كوپ مەيمان قابىلداعان وڭىرلەر قاتارىندا. 250 مىڭعا جۋىعى الماتىداعى قوناقۇيلەردى تاڭداعان. ودان كەيىن قوناقۇيدە كوپ توقتايتىنداردىڭ ۇلەسى استاناعا تيەسىلى. مۇندا 130 مىڭعا جۋىق تۋريست كەلدى. سولاردىڭ ءبىرى - رۋمىنيالىق وۆيديو دراگۋلينو. العاش رەت باس شاھارعا قىستا، جاڭا جىلدى تويلاۋ ءۇشىن قىدىرىپ كەلگەن.
وۆيديو دراگۋلين، رۋمىنيالىق تۋريست:
- نەگىزى، قىزىق بولدى. مەن قازاقستاننان كوپ نارسە كۇتپەدىم دە. سونشالىق ادەمى ەل دەپ ويلاماپپىن. مۇندا كورەتىن نارسە بارشىلىق. قالىڭ قاردى العاش كودىم. ەۋروپادا قار مۇنشا كوپ جاۋمايدى. اينالانىڭ ءبارى اپپاق تۇسكە مالىنىپ تۇرادى. وتە ادەمى. ادامدار دا ەۋروپالىقتار سياقتى ەمەس، جايباراقات ءارى وتە قوناقجاي. ءوزىمدى وسىندا جايلى سەزىنەمىن.
ەلوردانىڭ ءدامىن، حالقىن ۇناتقان وۆيديو وسى جولى دوسىن ەرتىپ كەلىپتى. جازعى استاناعا تامسانعان ولار الداعى ۋاقىتتا قايتا كەلىپ، الماتى ءوڭىرىن ارالاماق نيەتتە. جالپى، ەۋروپا ازاماتتارى قازاقستاندا 90 كۇنگە دەيىن ۆيزاسىز جۇرە الادى. تەك بۇنى ەكىنىڭ ءبىرى بىلە بەرمەيتىن كورىنەدى. قازاقستاندى كارى قۇرلىقتا كوبىرەك جارنامالاسا - ادامداردىڭ مۇندا اعىلىپ كەلەتىنى ءسوزسىز، دەيدى رۋمىنيا ازاماتتارى.
www.24.kz
