بريتانيادا العاش رەت جاتىر اۋىستىرۋ وپەراتسياسى ءساتتى جاسالدى
ەكى ايەلدىڭ دە جاعدايى جاقسى، دەپ حابارلايدى قازاقپارات BBC-گە سىلتەمە جاساپ.
وتا ءبىر اپتا بۇرىن جاسالدى، ءبىراق ول تۋرالى اپالى-ءسىڭلىنىڭ جاعدايى ءبىرشاما جاقسارعان سوڭ ەندى حابارلاندى.
حيرۋرگتاردىڭ ايتۋىنشا، ەكى رەت جۇرگىزىلگەن ءساتتى وتادان كەيىن ەكەۋىنىڭ دە «باقىتتان باسى اينالدى».
وتا وكسفوردتاعى اۋرۋحانادا توعىز ساعاتتان استام ۋاقىتقا سوزىلدى.
ەكى ايەل دە ەسىمىن جاريالاماۋدى سۇراعان. ۇلكەنى 40 جاستا، ونىڭ ەكى بالاسى بار، ول ەندى بالالى بولماۋ جونىندە شەشىم قابىلداعان.
ءسىڭلىسى مايەر- روكيتانسكي- كاستەر- حاۋزەر (MRKH) سيندرومىمەن تۋعان. وعان شالدىققانداردىڭ جاتىرى دامىمايدى نەمەسە مۇلدەم بولمايدى. ونىڭ باستى بەلگىسى - جاس ءوسپىرىم قىزداردا ەتەككىردىڭ بولماۋى. وعان الەمدە 5 مىڭ ايەلدىڭ ءبىرى شالدىعادى.
ءبىراق، اۋىراتىن ايەلدەردىڭ انابەزى زاقىمدالمايدى، قالىپتى جۇمىس ىستەپ تۇرادى.
بۇعان دەيىن مۇنداي ناۋقاستار سۋرروگات انالاردىڭ كومەگىمەن عانا بالالى بولعان. ترانسپلانتاتسيانىڭ كومەگىمەن ەندى ولار جۇكتى بولا الادى، ءبىراق تابيعي جولمەن ەمەس، تەك كەسار تىلىگىمەن بوسانادى.
جاتىر ترانسپلانتاتسياسىنىڭ باسقا ورگانداردان ايىرماشىلىعى - ول ءومىر بويىنا ەمەس، ايەل بالا كوتەرۋ ءۇشىن تەك بىرنەشە جىلعا جاسالادى. كەيىن ورگاندى الىپ تاستايدى، ايەل قالىپتى ءومىر سۇرەدى جانە يممۋندىق جۇيەنى تومەندەتەتىن دارىلەر قابىلداماۋعا بولادى.
وپەراتسياعا دەيىن ءسىڭلىسى ەمبريوندار جاساۋ ءۇشىن كۇيەۋىنىڭ سپەرماتوزويدتارىمەن ۇرىقتاندىرىلعان جۇمىرتقالاردى الۋ ءۇشىن وۆۋلياتسيانى ىنتالاندىرۋدىڭ ەكى سيكلىنان وتكەن.
ترانسپلانتاتسيا ءساتتى بولعان جاعدايدا ولاردى دونورلىق جاتىرعا ترانسپلانتاتسيالاۋ ءۇشىن ەڭ ومىرشەڭ بەس ەمبريون قاتىرىلدى. جەتەكشى حيرۋرگ پروفەسسور سميتتىڭ ايتۋىنشا، قازىرگى ۋاقىتتا ترانسپلانتاتسيالانعان جاتىر «وتە جاقسى جۇمىس ىستەپ جاتىر».
وسى جىلدىڭ كۇزىندە ۇلى بريتانياداعى تاعى ءبىر ايەلگە باسقا ايەلدىڭ جاتىرىن سالۋ جوسپارلانىپ وتىر.
تاعى بىرنەشە ناۋقاس ءوز كەزەگىن كۇتىپ ءجۇر.
