اقمولا وبلىسىندا جەڭىل كولىك ەلىككە سوعىلدى: ءبىر ادام كوز جۇمدى

كوكشەتاۋ. قازاقپارات - اقمولا وبلىسىنىڭ شورتاندى اۋدانىندا ەلىككە سوعىلعان جەڭىل كولىك اۋدارىلىپ، ءبىر ادام كوز جۇمدى، دەپ حابارلايدى قازاقپارات ءتىلشىسى وبلىستىق پ د باسپا ءسوز قىز مەتىنە سىلتەمە جاساپ.

ۆەدومستۆونىڭ مالىمەتىنشە، جول اپاتى تامىزدىڭ 23 ىندە ساعات 22:00 شاماسىندا «پريگورودنوە-جولىمبەت» اۆتوجولىنىڭ 37 شاقىرىمىندا بولعان. انىقتالعانداي، شورتاندى كەنتىنەن بەكتاۋ اۋىلىنا باعىت العان 29 جاستاعى تۇرعىننىڭ باسقارۋىنداعى «Lada Priora» كولىگى جولدىڭ ۇستىنە شاۋىپ شىققان ەلىكپەن سوقتىعىسقان.

سالدارىنان كولىك اۋدارىلىپ، 27 جاستاعى جولاۋشى (كولىك جۇرگىزۋشىسىنىڭ ايەلى) العان دەنە جاراقاتىنان كوز جۇمدى. سونىمەن بىرگە، كولىكتە 2 جاسار قىز بالا بولعان، ول زارداپ شەككەن جوق.

«قازىرگى كەزدە، وسى دەرەككە بايلانىستى قىلمىستىق كودەكستىڭ 345-بابىنىڭ 3-بولىگى بويىنشا سوتقا دەيىنگى ءىس قوزعالىپ، ساراپتاما تاعايىندالدى»، - دەدى ۆەدومستۆودان.

ايتا كەتسەك، بۇدان بۇرىن اقمولا وبلىسىندا جاياۋ جۇرگىنشىنى سوققان موتوسيكليست كومادا جاتقاندىعىن جازعان ەدىك.