گاز باللون جابدىعى بار ماشينالار ايىپپۇل تۇراعىنا جىبەرىلىپ جاتىر
سونىمەن قاتار تۇرعىندارعا ونداي ماشينالاردى تۇراققا قويۋعا تىيىم سالىناتىنى جايلى ءتۇسىندىرىلدى، دەپ حابارلايدى قازاقپارات.
توتەنشە جاعدايلار مينيسترلىگىنىڭ مالىمەتىنشە، ەلىمىزدە «گازباللون» جەدەل پروفيلاكتيكالىق ءىس- شاراسى وتكىزىلىپ جاتىر. اقتوبە جانە باتىس قازاقستان وبلىستارى دا قالىس قالعان جوق.
24-تامىزدا توتەنشە جاعدايلار دەپارتامەنتى مەن پوليتسيا دەپارتامەنتىنىڭ قىزمەتكەرلەرى «گازباللون» رەسپۋبليكالىق جەدەل الدىن الۋ ءىس-شارالارى اياسىندا رەيدتىك ءىس-شارالار وتكىزدى.
رەيد بارىسىندا ورال قالاسىنىڭ «ورال»، «ASIA MALL» ساۋدا-ويىن-ساۋىق ورتالىقتارىنىڭ، «يۋنيس سيتي» جانە «وليمپ» تۇرعىن ءۇي كەشەندەرىنىڭ جەراستى اۆتوتۇراقتارىندا ءورت قاۋىپسىزدىگى ەرەجەلەرىن بۇزۋدىڭ 4 فاكتىسى انىقتالىپ، اكىمشىلىك ءىس قوزعالدى. اتالعان ءىس-شارالار بارىسىندا بارلىق اۆتوكولىك يەلەرىنە قاۋىپسىزدىك تالاپتارى جەتكىزىلدى.
سونىمەن قاتار رەيد بارىسىندا اۆتوكولىك قۇرالدارىنا ءتيىستى رۇقساتسىز گاز-وتىن جۇيەسىن ورناتقان اۆتوكولىك يەلەرىن انىقتاۋ جۇمىستارى جۇرگىزىلىپ جاتىر. قۇجاتتارى جوق گاز باللوندى جابدىقتارى بار 5 اۆتوماشينا ايىپپۇل تۇراعىنا جونەلتىلدى.
«گازباللون» جەدەل پروفيلاكتيكالىق ءىس-شاراسى جالعاسىپ جاتىر.
ت ج م ءورت قاۋىپسىزدىگى ەرەجەلەرىندە قوزعالتقىشتارى سىعىلعان تابيعي گازبەن نەمەسە سۇيىتىلعان مۇناي گازىمەن جۇمىس ىستەيتىن گاز باللوندى جابدىقپەن جاراقتاندىرىلعان، وزگە ماقساتتاعى جانە ولارعا جاپسارلاس سالىنعان عيماراتتاردا، سونداي-اق جەر دەڭگەيىنەن تومەن ورنالاسقان اۆتوتۇراقتار مەن جابىق تيپتەگى ءۇي-جايلار مەن پاركينگتەردەگى اۆتوكولىكتەردىڭ تۇراعىنا تىيىم سالىنعانىن ەسكە سالادى.
