قازاقستاندىقتار كوبىندە قانداي اۋرۋلاردان قايتىس بولادى

استانا. قازاقپارات - وتانداستارىمىز ءجيى شالدىعاتىن اۋرۋ تۇرلەرى بەلگىلى بولدى، دەپ حابارلايدى قازاقپارات ءتىلشىسى.

«2021-جىلمەن سالىستىرعاندا وتكەن جىلى اۋرۋعا شالدىعۋ كورسەتكىشى %5,7 عا تومەندەپ، 48301,40 قۇرادى. سوڭعى جىلدارى ازاماتتار كوبىنە تىنىس الۋ ورگاندارى اۋرۋلارىنا ءجيى ۇشىرايدى (2021-جىلى - 21964,12، 2022-جىلى - 18883,3). ەكىنشى ورىندا - اس قورىتۋ جۇيەسىنىڭ اۋرۋلارى (2021-جىلى - 3981,2، 2022-جىلى - 3691). وتانداستارىمىز ءجيى شالدىعاتىن كەلەسى دەرت قان اينالىمى جۇيەسىنە قاتىستى (2021-جىلى - 3000,6، 2022-جىلى - 2759,6)»، - دەگەن جاۋاپ كەلدى دەنساۋلىق ساقتاۋ مينيسترلىگىنەن قازاقپارات ءتىلشىسى جولداعان ساۋالعا.

سونداي-اق، اتالعان ۆەدومستۆو ۇلتتىق ستاتيستيكا بيۋروسىنىڭ بيىلعى 6 ايداعى ءولىم-ءجىتىم جايلى مالىمەتىن ۇسىندى.

«ءولىم كورسەتكىشى وتكەن جىلمەن سالىستىرعاندا %9,3 تومەندەدى. ءولىم-جىتىمگە جيى الىپ كەلەتىن - قان اينالىم جۇيەسى اۋرۋلارى. ول بويىنشا بيىل 6 ايدا 147,22 ادام قايتىس بولعان. ەكىنشى ورىندا - قاتەرلىك ىسىك تۇرلەرى، بيىل جارتى جىلدا 66,13 ءولىم تىركەلدى. ءۇشىنشى كەزەكتە تىنىس الۋ ورگاندارى اۋرۋلارى، ول 64,42 ادامدى ولىمگە الىپ كەلگەن»، - دەيدى مينيسترلىكتەن.

ايتا كەتسەك، بيىل جارتى جىلدا مەديتسينا ساپاسىنا 4,6 مىڭنان استام شاعىم تۇسكەن.

سونداي-اق شەتەلدەن كەلگەن قازاقستاندىقتاردىڭ كوبىندە قانداي اۋرۋ، ينفەكتسيا نەمەسە ۆيرۋس جۇقتىرىپ كەلەتىنى بەلگىلى بولدى.